India hmar lam, Uttarakhand-a Hindu temple lar taka mipui pungkhawm tam tak innek buaina thlengah mi paruk vel an thi a, mi dang eng emaw zatin hliam an tuar bawk.
Haridwar-a Mansa Devi Temple-a Pathiannia chhiatna thleng hi temple panna kawnga electric hrui chak tak chat a tla nia sawi a awm hnuah mipui, pathian biak tuma kal khawmte hi an phili a, an buai zui ta a ni.
“Hrui chak tla hmuh khan mi a tibuai ta a, himna zawngin a rem dan zawng zawngin an phusa ta chiam a ni,” tiin tual chhung police hotu, Ritesh Saha chuan The Times of India chanchinbu a hrilh.
Uttarakhand-a sorkar hotu, Vinay Shankar Pandey-a chuan thi zat hi a puang a. Damdawi in thuneituten mi pakhat electric man a awm a, mi dangte chu innek buaina chhuaka chil hlum an ni tih a sawi niin Indian chanchinbute chuan an tar lang.
Police leh emergency services ten rang takin a hmun hi an thleng a, chhanchhuah hna an thawk nghal a. Hliam tuar mi 35 vel chu a bul hnai damdawi inah an kalpui nghal tih Pandey-a chuan a sawi.
“Tunah chuan engkim thunun tawh a ni,” tiin The Associated Press news agency hnenah phone-in Haridwar atangin a hrilh a. “Mahse, mi an chiai a, boruak a la pangngai chiah lo,” a ti bawk.
Thuneitute chuan chung lama electric hrui zam a chah ngawt theih dan leh hetianga tam mi pungkhawm thununna a tha tawk lo em ni tih chu an en zui mek a. He temple khua hi kum tin mi maktaduai telin an tlawh thin hmun a ni.
Uttarakhand Chief Minister Pushkar Singh Dhami-a chuan, “Mansa Delhi Temple, Haridwar panna kawnga innek buaina thleng a awm tih ka lo hria a, pawi ka ti tak zet a ni,” tiin X-ah a tar lang.
India-ah hian sakhaw thila punkhawmnaah tum khata inhawr khawm chiam hi thil thleng pangngai a ni a. Heng punkhawm tamna hi temple leh biakzinna hmun, hun bik nei emaw, hmun pawimawh bikah emaw a ni tlangpui a, hetiangah hian mi an tam thin em avangin a hmunhma leh venhimna pawhin a dawl zo lo fo a ni.
June thla khan tuipui kama Odisha-ah Hindu sakhaw kût hmanaa innek buaina thlengin mi pathum vel an thi a, mi eng emaw zatin hliam an tuar bawk a. Hemi hma hian khawthlang lama Goa-ah puithuna thila mei nena kalte ena punkhawmnaah mi paruk an lo thi tawh bawk.
January thla khan sakhaw thila khawvela punkhawmna lian ber, Uttar Pradesh-a Prayagraj-a Kumbh Mela hman laiin zing khaw var hmaa kal hmasa nih inchuh innek buainaah mi 30 vel an thi bawk.