Fur a thlen apianga Mizoram chhung kawng chhe chak ta viau leh lirthei tlan ngam lohna khawp a ni reng ta mai hi i vei ang u. Hmala theitu leh hmala tura ngaihte an ngawi rei lutuk thinte hi ngaihtuah chiang ila, nawr ngai chu tun atangin kum tluanin, tha thlah lovin i nawr pawp pawp ngam teh ang u.
Kan ram kawngpuite hi a siamna hmanrua a chhe bik ni pawhin a hriat loh a, ngaihsak leh enkawlzui, vil zui a hlawh lo lutuk hi kan mutan pakhat chu a ni.
Sorkar lahin a enkawltu lam an puh a, an hna a nih loh thu min sawikhum thul, an hna a nih loh chuan na zawka nawr an ngam chuang lo ni berin a lang thin si. Engkima ramchhunga thuneitute ber chet lak a muang leh lutuk thin ber hi a veiawm lai chu a va ni si em.
Kan kawngpuite hi furpui a thlen apianga buaina thlenna bul an ni ta zel mai a, lirthei lian an tlan ngam thin lo bawk nen. Heng zawng zawng hi kumtin kan hriat a ni chung hian hmalak a chak hlei thei lo tlat zel hi a mak a, endiktu leh vilzuitu lah an awm ngai hek lo. Lirthei an tlan theih loh chiahin sorkar a a kisang chelhtute an kal ta fo thung a, kan chezia hi a letling hlauh thin chu a ni.
Mipuite harh thar ila, kawngpui tha mai bakah, tui leh eng kan hmuh that theihna tur hi thlir ranin ram hruaitu thlante hi i ching lehzual teh ang u. Kan ram hian chhantu a ngai takzet si a.