MPCC General Secretary PC Laltlansanga chuan Congress, MNF leh ZPM sorkar laia kawng chhiate patla khata khai theih an ni lo tih sawiin, “Tun lai Sairang leh Kawnpui inkar kawng chhia hi ZPM sorkar inthlahdah vang liau liau a ni,” a ti.
Inrinnia Congress Bhavan, Aizawla political session neihah MPCC General Secretary PC Laltlansanga chuan Congress sorkar kum 10 hnuhnung zawh khan ruahtui a tam a, kum thum chhungin ruahtui ML sing hnih chuang a zawn zatin a tla a. Kum 2017 phei chu Mizoram state a nih hnua ruahtui dawn tam ber kum a ni a. MNF sorkar hmasa kum 10 chhung khan ruahtui 2,000 ML chuang a tlak kum thum chauh a awm tih sawiin, “Khati taka a zawna kum thum chhung ruahtui a tam avang khan kawng siamna hun tha a tlem a, kawngpui siamna tur bik liau liaua kum 2018 PWD budget Roads & Highway head-a Rs 20,632.74 lakhs dah kha Congress sorkar khan a tlak san a ni,” a ti.
PC Laltlansanga chuan tuna buaina ber Kawnpui leh Sairang inkar kawng NH-06 hi nikum 2024 furah pawh khan a chhe tawh tih a sawi a. September 2024 atangin NH 06 hi Mizoram sorkar PWD kutah a awm a. NHIDCL hian Mizoram sorkar kut atangin July ni 7 2025 atang khan an la chhawng chauh a ni tih sawiin, “|hal khaw tha thla kua chhung PWD kutah a awm. Chuvangin helai kawng chhiat avanga harsatna kan tawh mekte hi sorkar mawh liau liau a ni,” tiin, Congress, MNF leh ZPM sorkar laia kawng chhiate patla khata khai theih an nih loh thu a sawi.