Aizawl: Kum 1999-a Kargil War-a India-in hnehna a chan hriatrengna leh he indonaa sipai nunna chante hriatreng nana hun hman, Jargil Vijay Diwas pualin Inrinni khan BJP Mizoram chuan an party pisaah an hmang.
BJP State Vice President Vanupa Zathang kaihhruai inkhawmah Palak bialtu MLA K Hrahmo chuan, Kargil indo hunlaia India ram puitu pawimawh tak chu Israel ram an ni a, Israel-in a puihna avangin Kargil War-ah pawh khan a chak a. Kargil War-ah khan India sipai huaisente chu khaw luma piang leh seilian ni mah se, an tawrhchhelna leh an tumruhna leh an huaisenna avangin India chuan hnehna a chang thei a ni. India hmalakna fing tak avang khan khawvel pawhin India an hmuh dan a dang ta tih a sawi.
Tunah chuan India ram ropui tawh zia a hriat tih sawiin K Hrahmo chuan, “Keini Mizoram mipuite pawh India rama kan awm hi kan vannei hle a, lawmna chang kan hriat pawh a ngai a ni. India ram hausakna chhawr ve turin Mizoram mipuite pawh kan inbuatsaih a, kan ngaihtuahna kan sen a ngai a ni,” a ti.
Inkhawm zawh hian sipai huaisen ram tana nun chante hriatrengna leh zahna entir nan War Memorial, Zodin Square-ah K Hrahmo MLA, Vanupa Zathang IPS (Retd) ten pangpar an dah bawk.