Mizo National Front (MNF) party chuan ZPM sorkar chu chhiah petu mipuite tan rin zui a harsa tawh dawn tih sawiin, mipui hnena an chhiah khawn khawm atang hian kawng chhia siam hna thawk mawlh mawlh turin an phut.
Inrinni khan Aizawl Press Club-ah chanchinbumite kawmin MNF Publicity Board Vice Chairman J. Malsawmzuala Vanchhawng chuan hriat theih chinah kumin ang em ema Mizoram châk lakna kawngpui pawimawh a chhiat nasat tum leh heti taka mipuiten an tawrh nasat tum hi Mizoramin a la tawng ngai lo tih sawiin, “Hetia kawng a chhiat chhan hi a siam hun laia sorkarin hma a lak loh vang a ni,” a ti.
J Malsawmzuala Vanchhawng chuan kuminah Mizoram châk lakna kawngpui, a bikin Kawnpui-Khamrang leh Khamrang leh Buichali inkarte a chhe nasa hle dawn tih mipui nawlpui pawhin an hrethiam lawk a, sorkar phei chuan a hmu lawk chiang sa tih a sawi a. Kawng siamna tur sum a awm thu leh ruahtui a hul veleh kawng siam tan tum a nih thu pawh nikum lam kawng chhiat vanglai, September, 2024 khan PWD Minister Vanlalhlana’n a lo puang tawh a, kawng siamna tura a bik taka tuialhthei atanga ZPM sorkarin chhiah a lak, road maintenance cess tling khawm pawh tun dinhmunah Rs. 25,54,57,771 zet a ni tawh tih a sawi.
Tuna kawng chhe zual em em, Kawnpui-New Khamrang hi nikum lamah pawh mipuiten nasa taka an tawrh chhan a lo ni tawh tih sawiin J Malsawmzuala Vanchhawng chuan, September, 2024-ah sorkarin contractor bântirin a security pawh Rs nuai 35.37 lai a chhuhsak tih sawiin, “Contractor security chhuhsak kha kawng siamna tur liau liaua mipui chhiah pek khawm leh state sum pawha belh chhahin, thal chhung khan lo siam chu ni se heti em em hian mipui kan buaiin kan tuar lo ang,” a ti.
J Malsawmzuala Vanchhawng chuan September, 2024 atang khan ZPM sorkarin motor kawngpui siamna tur chhiah (cess), diesel leh petrol atangin litre khatah Rs. 2 ve ve leh social infrastructure cess Rs. 2 ve ve, a vaiin litre khatah Rs. 4 zel lirthei neitute a chawitir tan a, chu mai duh tawk lovin diesel atanga VAT lak mek pawh a let deuh thaw, 5.23% atangin 10%-ah leh petrol atanga VAT lak chu 16.36% atangin 18%-ah a ti pung tel tih a sawi.
Sum nei reng chung si leh kawng a chhe nasa hle dawn tih hre lawk reng chung sia ZPM sorkarin thal chhung zawng hmalakna mumal a nei lo hi mipuite ngaih pawimawh lohna nasa tak a ni tih sawiin J Malsawmzuala Vanchhawng chuan, “ZPM sorkar hi chhiah petu mipuite tan rin zui a harsa tawh dawn a, an laka beiseina neih chhunzawm pawh a harsa hle tawh dawn a ni,” tiin, lirthei neitu zawng zawng leh lirthei hman man chawi thin zawng zawngten kawng siam nan chhiah nasa tak an chawi miau a, mipui hnena an chhiah khawn khawm atang hian a siam hna thawk mawlh mawlh turin MNF chuan a phut tih a sawi.