Rural Development (RD) Minister Prof Lalnilawma chuan sorkar laipuiin ni za inhlawhna kalphung a tihdanglam avangin a tak taka thawh a ngai tih a sawi a. Inbum a theih tawh dawn loh thu leh dan bawhchhiate chu khawi state mah ngaihhnathiamna pek a nih tawh dawn loh thu a sawi.
Thawhtannia a pisa-a thu thar thehdarhtute a kawmnaah Prof Lalnilawma chuan, July 8, 2025 khan sorkar laipuiin state tinte hnenah MGNREGA hnuaia inhlawhna kalphung a tihdanglam thu a hriattir tih a sawi a. Sorkar laipui chuan ni za inhlawhna hi a tak taka kalpui a, hna an thawk tak tak a ni tih lantir theihna tur mobile apps, National Mobile Monitoring Service (NMMS) atangin hnathawh tan tirh leh bân dawnah attendance capture vek turin state tinte thurawn a pe tih a sawi.
Prof Lalnilawma chuan, “Hnathawh tan tirha mihring 20 kan lan chuan hnathawh tan tirh a mihring 20-te vek kha bân dawnah NMMS hian a capture leh a ngai a. Mihring ngai vek an lan loh chuan reject tur niin, hnathawk lo angah kan awm dawn a, hlawh pawh kan nei thei dawn lo a ni,” tiin, BDO leh MGNREGA hnuaia VLAA, Technical Assistant, Barefoot Technician te leh Mates te bakah VC/VEC leh mipuiten hei hi palzam mai lovin, thahnem ngai taka dik tak leh fel fai taka ni 100 inhlawhna an kalpui a ngai tak zet zet tawh tih a sawi.
RD minister chuan, “Ministry of Rural Development hian NMMS hi ngai pawimawhin he mobile app atanga attendance-te hi ram pum huapa kalpui tur tiin, khawi state mah hi ngaihhnathiamna kan pe dawn lo a, dik lo taka hnathawk leh attendance capture thinte lakah pawh Zero Tolerance Policy kan apply tiin leh hre reng chunga tisualtu chungah na taka action la turin state zawng zawng min rawn ti a ni,” a ti.
MGNREGA dan hnuaia land development hna hi cultivable land ni lo, ram chhia leh kalsan tawh hmunte chei that nana thawh tur a nih thu sawiin RD minister chuan, “Mi mal ram tha lai leh thlai chin nana hman lai ramte hi thawh phal a ni lo a ni,” tia sawiin, mi mal ram chhia leh ram buate cultivable land-a siam tura thawhsak bakah mipui vantlangten an chhawr tangkai theih tur community land development lamah inthlur bing a ngaih thu a sawi bawk.
Mizoramin ni 100 inhlawhna hi a rinpui ber a nih chuan tuna an kal dan pangngai anga an kal put put a rem tawh dawn lo tih sawiin, “Tuna kan kal dan anga kal kan tum chuan kan buai nuai dawn a ni. Inbum a theih tawh dawn loh va, a tak taka thawh a ngai tawh dawn a ni,” RD minister chuan a ti.
Zawhna chhangin, tun dinhmunah kuminah hian ni 26 hna thawh tawh a nih thu a sawi bawk.