Zoram People’s Movement (ZPM) thupuangtu, K. Laltluangkima chuan Mizoram chief minister car thar lei chu chief minister chuanna atan chuan car pangngai mai a ni tiin, “Mi ramah chuan mi satliah car ang a ni a, hmeichhe khalh tawka ngaih, naupang football khel tur hruaina tawk a ni,” a ti.
Nimin khan Aizawl Press Club-ah chanchinbumite kawmin ZPM thupuangtu chuan, “Kan CM car hi a to kan ti a nih chuan ‘to’ chu a ni mai ang a, eng car pawh lei se tu emaw tan chuan to chu a ni mai zel ang a. CM level atan chuan a to lo va, car satliah a ni a, kan thikthu kan pe chhe mah mah a ni,” a ti.
Mizoram CM chuan car tha a mamawh tih sawiin, “Mizoram hi international ram depa awm kan nih avangin kan CM hian Z+ category security a nei a. Kan CM-in campaign laia ‘car man tovah ka chuang lo vang’ a tih hun lai nen khan thil a danglam nasa tawh hle a. Kawl ramah pawh Kawlho chang an do lo va, Zo hnahthlak leh Zo hnahthlakte pawh an indo tawh a ni a, chutiang khawp chuan kan ram dep ho hi a ralti a, chutih lai kara car man tlawm ber mai kan ram lal ber tana lo la hisappui tlat hi chu thil intu lo tak a ni tawh,” a ti.
K Laltluangkima chuan India sorkarin CM tana a pek theih security chu Z+ a ni a, PSO pathum, pilot personnel mi 15, escort personnel mi 19 hmang reng thei a ni tiin, “Chu chu amah hi chuan a hautak a tih avangin a duh lo zawk a. A tul a tih chuan bullet proof car pawh hmang thei a ni a. Chutih lai karah hetiang car satliah a a inhnukhniam thei hi chu fak mawlh mawlh tur zawk a ni,” a ti.
Sairanga sawhthing tawih nia sawi chungchang sawiin K. Laltluangkima chuan, “Sawhthing dah tawih tihho kha chu sawhthing hralh tlak leh hralh tlak loh thliarna lama tha lo zual paihte an ni,” tiin, thlai thar hi sawngbawl an ngaih thin thu leh lo neituten a chhia leh a tha an dah pawlh chuan lo then fai a ngai thin avangin, an tih tihin an ti ang a. Sawhthing-ah kher kher hi chuan ZPM hi chu lo sel lo se a duh tih a sawi.
MNF party-in Fisheries department-ah sum bothlau a awm nia an sawi chungchang chu sawi fiahin, “MNF-in a amount an sawi nuai 100 ni lovin nuai 1,000 lai a ni a, an sawi ang hian April 25, 2025-ah sanction hmuh a ni a. Tichuan budget allocation dil thuai a ni a, April 27, 2025 khan expenditure sanction dil leh mek a ni,” tiin, Reserve Bank of India-in him takin tunah hian an kawl mek a, a hun taka sanction order tichhuah mai tur a nih thu a sawi.
Mizoram Universal Health Care Scheme (MUHCS) chungchangah MLA Dr. K.Beichhua-a’n ‘MUHCS laimu atan ABPMJAY rinchhanin he health care hi siam a ni tih tunah chuan kan chiang tawh a,’ a ti chu a dik lo tih a sawi a. ABPMJAY ai chuan MUHCS hian a huam zau zawk a, MUHCS hi chuan Mizoram khua leh tui dik tak zawng zawng a huam vek niin K Laltluangkima chuan a sawi bawk.