Indian football-in hun khirh tak a tawng mek a, All India Football Federation (AIFF) chuan Zirtawpnia mipa team head coach tur puan a tum mek bawk.
National team hi tun hnaiah an che chhia a, Fifa ranking-ah an hnungtawlh nasa a, kân leh kân loh hriltu a nih theih dawn avangin tun tum coach lak tur hian ngaihven a hlawh.
An hmaah Asian qualifier khelh tur a awm a, fan-ten khawhawi thar an beisei bawk a, Indian football hma hun hriltu ni tura ngaih a ni.
AIFF executive committee chuan tual chung leh khawvel huap pawha tawnhriat lo nei tawhte an dap a. Hming langsar zual pawh an awm.
Langsar ber ni mek chu Khalid Jamil-a a ni a. Indian football coaching-a hriat hlawh tak, 2016–17 I-League season-a rin loh taka Aizawl FC chanmpion-puitu hi a hming a ri nasa.
Indian Super League (ISL)-a Jamshedpur FC enkawl mektu, Jamil-a hi thununna ngai pawimawh niin ISL semi-final pawh lo thleng tawh a ni a. Indian football inkhaidiatah a chiang a, AIFF Coach of the Year vawi hnih ni zawn thei a ni a, tual chhung mi zingah chuan India din thar thei ngei tura ngaih a ni.
India head coach hlui, Stephen Constantine-a hming pawh a ri thar leh a. Ani hi khawvel huap coaching tawnhriat nei tha niin Indian team pawh vawi hnih a enkawl tawha hma lam panpui thei a ni.
A kaihhruaina hnuaiah India hi 2016 SAFF Championship-ah champion-puiin 2019 AFC Asian Cup a khelhpui bawk a. FIFA ranking-ah pawh hma lam panpui thei a ni.
Constantine-a hi inthununna ngai pawimawh leh nawrna nasa tak karah pawh mahni thu kaltlangpui ngam thin a ni a. Tun hnaiah Pakistan enkawlin FIFA World Cup qualifier-ah a vawi khat nan hnehna a chanpui nghe nghe.
Stefan Tarkovic-a hming a langsar bawk a. Slovakian coach hi Europe piah lamah pawh ram team enkawl tawh a ni a, Slovakia leh Kyrgyzstan pawh lo kaihruai tawh a ni.
An ram hi Euro 2020 khelhpuiin an aia football ram lian, Poland a hnehpui hial a. Kyrgyzstan enkawl lehin World Cup qualifier a khelhpui a, 2027 AFC Asian Cup khel turin a tlinpui bawk.
Tarkovic hi tlarhnung phui ngai pawimawh leh tlarhnung atanga lehlam pawl nawr ngaina chi a ni a. UEFA Pro Licence nei niin tactical leh technical-ah theihna nei sang a ni a, khawvel huapa football inelna sang ber ber pawh lo hmachhawn tawh a ni.
AIFF executive committee chu Zirtawpni hian thu ngaihtuah pakhat, mipa national team head coach tur ruat turin an thukhawm dawn a. He hna hi Spaniard Manolo Marquez-a kalsan niin India a hruai chhungin a chet thatpui lo va, Fifa ranking-ah nasa taka tawlh hnunpuiin No. 132-na a ni mek.
September-ah ram leh ram inkhelh a awm dawn a, October thlaah Asian Cup qualifiers khelh a ni dawn bawk a, heng hunah hian team hruai thei tur hmathlir nei tha, tawnhriat nei ngah tawh bawk AIFF chuan a duh.
AIFF hian tual chhung tactician nge a thlan dawn ram dang atangin tih zawhna a awm mek a, an thutlukna hi tun dinhmuna Indian football chawi nung theitu tur leh hma lam hun thui tak hril thei tura ngaih a ni.