Aizawl: Mizoram Pradesh Congress Committee (MPCC) Legal Department Chairman TT Zothansanga chuan Congress leh MNF hun laiin, Samthang zikhlum chingtuten a tihralna kawngah harsatna an tawk ngai lo niin a sawi.
Nimina Aizawl Press Club-a thu thar thehdarhtute a kawmnaah MPCC PAC chairman ni bawk, TT Zothansanga chuan, Samthang zikhlum neitute an mangang tawh hle tih sawiin, “An hralh theih loh avanga tam tak tawihral te a awm bakah, a then chu vawk chaw atan bag khat Rs. 300 a hralh te, tihngaihna hriat loh avanga leitha atana satsawm te an awm a ni,” a ti.
Samthang zikhlum chingtute thar chhuah chu Aizawl veng hrang hrangah YMA ten an lo zawrhpui thu te, quintals 350 zet an lo tihral sak thute sawiin TT Zothansanga chuan “YMA te kai chhana sawm tul khawpa kan loneitute manganna ang hi Mizoramah a la awm ngai lo,” a ti bawk.
TT Zothansanga sawi danin, Samthangah in 145 in zikhlum an ching a, Khankawnah In 111, East Tuipui bial khaw hrang hrangah in 400 chuangin zikhlum hi innghah nan an hmang a, an vaiin zikhlum tiak nuai 30 vel an phun a, thar chhuah an beisei zat chu quintals 10,000 chuang zet a ni.
Tuna ZPM sorkar hi thlai thar buaipui chungchanga beiseina sang tak nena Zoram mipuiin an thlan an nih thu sawiin TT Zothansanga chuan, “Thlai thar hralh chungchangah hian tun ang harsatna hi kan tawk ang tih tuma’n an ring ngai lo,” a ti a. Leina tur D-A-H a ri ring hle a, an han sorkar a, a thlangtu mipuite an hawisan chiang hle niin a sawi.
“Congress leh MNF sorkar laiin hetiang taka harsatna nasa hi kan la tawka ngai lo, a chhan chu tihtakzeta mipuite hmakhua kan ngaihtuah thin vang a ni,” a ti bawk.