MPYCC chuan an sorkar inthlahdahna vang leh nuamtawlna lam an tuipui luat avanga Mizoram châk lakna kawngpui ber, lirthei zawh hleih theih loha hun rei tak a awm hnua nimina ZPM Thalaiin hnatlang an nei chu ZPM sorkar mawng hlimnaah an ngaih thu an sawi.
Nimina thuchhuah an siamah Congress Thalaite chuan, ZPM sorkara PWD Minister rin tawk lo va, kawng siam mek viltu tur Minister leh MLA detailment an lo siam chu thil zahthlak a nih hriain, Mizoram enkawl kawngah tihtheih an neih lohzia leh an hlawhchham a ni tih pawm mai turin thurawn a pe tih an tar lang.
Congress Thalai chuan ZPM Chief Minister Lalduhoma’n kum 2023 MLA inthlan hmaa Vana pa hall-a Chief Ministerial candidate puan inkhawmah, ZPM a sorkar rualin kawng chhia leh kawng tlo lo lutuk tih bo an tum thu te, kum 15 daih kawng siam a nih tur thu te, kawng siamna hmanrua, khawl changkang hman a nih tur thu te a sawi a. Chutih laia ZPM thalaite kawng chhe siama hnatlang turin chem, tuthlawh, bawngtuthlawh leh suahdurte keng tura an inti leh si chu thil nuihzatthlak leh thil zahthlak tak a ni tih hria a rang taka chief minister-in a sawi, khawl changkang tinreng hmanga kum 15 daih kawng siam tura ngen zawk turin ZPM Thalai te an chah.