Mizo entertainment khawvel tana mi hlu, Mizo Dance camp neitu Alan Lalrinawma, kum 32, s/o Andrew Lalsangzuala, Electric veng, Aizawl chu thawhlehni zan khan a thi a, nimin khan vuiliam a ni.
Alan Rinawma hi hun eng emaw ti atang khan natna neuh neuh neiin a hriselna a tlahniam a. A khat tawkin damdawi in lamah luhpui thin niin, ICU-ah te enkawl a ni reng thin a. Thawkkhat lai khan a hriselna rawn kang deuh mah se, tun hnaiah Ebenezer Hospital panpui leh niin ICU-ah enkawl leh reng a nih hnuah, thawhlehni zan dar 8:20 khan ril TB avangin a thi a ni.
A boral zan hian Electric Veng-a an chenna inah lumen niin, nimin chhun dar 12-ah khan vuiliam a ni.
Alan Rinawma hian kum 11 kalta khan Mizo Dance Camp hi dinin, Creative Director a ni. Mizorama show leh event lian zawng zawng bakah, Mizo zaithiamte’n an music video-ah choreograph atana an rawih ber thin a ni.
Mizo Dance Camp atang ringawt pawh hian zirchhuak an tam tawh hle a. Mizo dancer tha leh hriat hlawh ber berte hi a chher chhuah ti ila a sual tampui awm lo ve.
Kumin May thlaa Ramthar veng Presbyterian Kohhranin Golden Jubilee puala Rampum Huap Faklam Intihsiak an buatsaihah pawh khan taksa chak lo tak chungin Zuitei, Henry Varte, Zoramchhani te nen judge thutthleng an luah ho a ni.
Hei bakah, KTP General Conference atan hian branch hrang hrang Faklam panga-ah sulhnu a hnutchhiah tawh a. Nikum tir khan a kaihhruaina hnuaiah Mizo Dance Camp team hian Guwahati-a Radio Music Awards-ah an lam tawh bawk a. A hming leh Thazual Awards, Mizo Idol leh Miss Mizoram show performance hi a inkawp tlat tawh bawk.
Alan hi Music Domain Mizoram (MDM) ah pawh Executive member ni reng thin a ni.