Aizawl: Sports Minister Lalnghinglova Hmar chuan nimin khan Art & Culture Auditorium, Berawtlangah North East National Service Scheme (NSS) Festival 2025 hawnna hun chu khuallian niin a hmanpui.
Festival hawnna inkhawmah thu sawiin Minister Lalnghinglova Hmar chuan, Mizoramin NE NSS Festival 2025 a thleng chu lawmawm a tih thu a sawi a. NSS chu thalaite hnena zirlaibu pawn lama thil pawimawh zirtirtu, khawtlanga an mawhphurhna hriattirtu a ni, a ti a. Mizoramah ngei pawh NSS hnathawh rah chu awmze nei leh hmuh theihin a awm tih sawiin, Covid-19 laia an tangkaizia leh, thing phun leh faina lama an thawh hlawk hle tih a sawi.
Sports Minister chuan he kut hi hnamzia leh tobulte inzirtawnna atan leh thian tha leh inthlunzawmna tha siamna atana hmang turin hmarchhak state hrang hrang atanga NSS volunteer kalte a chah a. Ramin a mamawhna au aw chu NSS kaltlanga chhang a, khawtlang khaichhuahna atana an theih ang tawka an thawk chu lawmawm a tih thu sawiin, NE NSS Festival chu hlim tak leh hlawk taka hmang turin duhsakna a hlan a ni.
North East NSS Festival hi August 5, 2025 atanga August 9, 2025 thleng, a awh dawn a. Kut chhung hian thupui hrang hrang an zir thin bakah, cultural programme-te, walkathon (Fit India Movement)-te, social work-te neiin, Reiek Tlang an tlawh bawk ang.
Festival-ah hian Arunachal Pradesh aiawh tih loh Mizoram, Assam, Manipur, Nagaland, Tripura, Sikkim leh Meghalaya atangin NSS volunteer 250 vel leh Programme Officer-te an tel a ni.