Aizawl: Tun hnaia India ram hmun hrang hranga nungchate zirchianna kal zelah, Department of Zoology, Mizoram University-a head ni mek, Prof. HT Lalremsanga leh a research scholar, Lalmuansanga te chuan an thawhpuite nen Mizoram hmun hrang hranga herpetological expedition an neihna atangin an pianphung, phuhlip inrem dan leh DNA zirchianna atangin rul species thar hmuchhuakin, a hmingah Smithophis leptofasciatus tiin an phuah.
He rul hmuhchhuah thar chungchang hi August 5, 2025 khan international scientific journal, Taprobanica (The Journal of Asian Biodiversity) vol. 14 (issue no.02) chuan a rawn tlangzarh ta a ni.
Prof. HT Lalremsanga chuan, “Khawvel pumah Smithophis rul te hi species panga hmuhchhuah tawh niin, India hmarchhak leh a chhehvelah te hmuh an ni a. Mizoram atang hian species thar pahnih – Smithophis atemporalis leh Smithophis mizoramensis te kan lo hmuchhuak tawh a. Tuna mi described thar hi Meghalaya atangin kum 1855 daih tawh a hmuhchhuah tawh, Smithophis bicolor anga ngaih a ni char char thin a. Amaherawh chu, ngunthluk lehzual a zirchian a nih hnuah an pianphung thenkhat leh DNA-ah ringawt pawh 11.5% lai a an lo danglam avangin species hran daih leh a thar a lo ni reng a ni tih hmuhchhuah thar a lo ni ta a.
“Heng rulte hi an biology hriat tur mumal ala tlem hle a, rul tur nei lo chi niin changpat an duh hle a, ruahsur laiin rampalaileng leh ngaw hnuai, tui awmna bul leh a velah te an lo chhuah thin avangin Ruah Lawm Rul an ti a. Tuna species hmuhchhuah thar pawh hi Ruah rul tiin kan vuah a ni,” a ti.