Aizawl: Sairang leh Kawnpui inkar kawng siam mek chu nimin khan Supply Minister B Lalchhanzova’n a en fiah.
Minister hian Thlanvawng kawna box culvert dah mekte, Buichali peng thlen hmaa kawng chhe zual laite, Mualkhang Nazareth vengte, Khamrang peng atanga km 2 bawr vela kawng chhe laite, Zatawna petrol pump bula kawng siam laite, Mega Food park bul bawra kawng chhe laiah te leh hmun dangah te dingin, hnathawh kal mek chu enin thawktuten harsatna an thlente chinfel dan turte an sawi ho.
Kawng a enfiahnaah B Lalchhanzova hian kawng siam a hnatlang Sairang, Mualkhang, Khamrang, Mualvum leh Bualpui Branch YMA te hnenah sorkarin hnatlang a puihna sumfai eng emaw zat a hlan hlawm a. Driver tangkhangte chhawmdawlnana sorkarin ration package a siam pawh Kolasib Sub Hq YMA te kaltlanga semte pawh Kawnpui-ah mi eng emaw zat hnenah a hlan. Driver tangkhang ration package – buhfai, dal, alu, tel leh purunsen pek chhuah hi mi 492 an ni.
Minister hian driver tangkhangte pawh kawmin, chhel taka an awm chu fakawm a tih thu leh chak zawka kawng siam anih theih nana NHIDCL leh Mizoram sorkarin ruahmanna an lo siam chu theih anga chaka an kalpui mek thu leh, tangkhangte pawh an chhuah vat a beisei thu a sawi.