Mizoram châk lak luhna kawngpui ber a chhiat avangin khawsak phung a nghawng tan a. Eichawp dawr nghaktuten bungraw lak tur an nei tawh mang lo.
Kawnpui leh Sairang inkar kawng chhiat avanga bungraw phur lirthei lian tlan theih loh avangin ni tin mamawh a vâng tawh hle a. Eichawp dawr nghaktute pawhin an bungraw zawrh tur la turin inchuh deuh titih a ngai tan niin an sawi.
The Zozam Times zawhna chhangin Bawngkawna eichawp dawrkai pakhat chuan, “Bungraw lak tur a vâng tawh a. Vawiin (nimin)-ah pawh bungraw, a bikin Lays pawh tlawn khat tetea insem a ngai a. Bawnghnute phei chu a thleng lo hrim hrim, a thlen lohna a rei tawh a. Bungraw hi tlem tetein a rawn thleng veleh zauh thin a. Wholesale dawr neiho pawhin neih an nei tawh mang lo,” a ti.
Eichawp dawrkai thenkhat pawhin bungraw stock sa tlem tê bak chu lak belh tur a awm tawh meuh lo tih an sawi a. Bawnghnute hi a thlen lohna a rei tawh avangin, a bikin Amul leh Nestle product hi lak tur a vang tawh hle a. Hei vang hian thingpui dawr siamtu zingah thingpui nei lo pawh an awm nual tawh.
Eichawp dawr bakah in sakna bungrua zawrhna dawrte pawhin stock an nei mumal tawh lo va, cement zuarte pawhin zawrh tur an neih tawh mang loh avangin in sa lai mekte an hna a khaihlak phah nasa hle nia sawi a ni.
Hetih lai hian August 2, 2025-a Home Minister K Sapdanga hova Sairang leh Kawnpui inkar kawng siam mek an tlawh tuma ruahmanna an siam danin August 4-9 chhungin ngawrh lehzuala kawng siam hna hi thawh tura tih a ni a. He ni nga chhung hian PWD leh NHIDCL-ten an tha zawng zawng hmangin kawng siam hna an thawk ang a. August 4-6 inkarah phei chuan lirthei eng chi mah tlan phal a ni dawn lo a, hetih chhung hian 407 chin hnuai lam tan tlang kawngah (Kawnpui-Serkhan-Durtlang road) tlan theih tura ruahman a ni.
July 31, 2025 khan lirtheia eizawng pawl hrang hrang 22-te chuan Mizoram châk lakna kawngpui pawimawh, Vairengte leh Sairang inkar kawng chhe zual lai chak zawka siam anih theih nan August 4-9, 2025 chhungin ‘tlan chawlh’ an lo puang tawh a. Tun hnaia joint committee an neihah bungraw phur lirthei an tlan loh avangin Mizoram chhungah bungrua a vân phah a, chu chuan mipuiah harsatna a thlen phah chu a pawi an tih thu an sawi a. Kawng chhe siama sorkar hmalakna hi an enfiah dawn a. An thil hmuh a zirin an kal zel dan tur pawh a tul angin an ngaihtuah zel tur thu leh, kawng chhe siam hna thawha hmalakna hi an vil zui reng dawn tih an sawi bawk.