Engatinge?:
Chhan buai vak ngai lovin, mipate aia an tet zawk vang a ni a, a saptawng takin, dose hi a inang lo em em a ni. Hmeichhiate hian an mahni taksa milpui mipate nena khaikhin pawhin an taksaah tui an pai tlem hrim hrim a, an thisena Zu hnathawh dan hi mipate aiin a sâng zawk a, Zu in zat inang ro roah pawh an buai hmâ zawk.
NAUPAI TAN HLAUHAWM
Naupai tawh chuan ‘pack’ khat emaw Zu far khat ringawt pawh hi a tha lo hrim hrim. Thisen-a Zu lo inchiah ve khan naute thisenah a lo zuk lut ve thin a, chu chuan nau neihnaa harsatna te, pian fuh lohna te bakah nau chhiatna thlengin a thlen. Chu mai a la ni lo cheu, naupai tura i inbuatsaih a nih chuan Zu reng reng in loh tawp tur a ni a. Nau hnute pek lai pawh hian a him hran chuang lo. A chhan chu, naute tana i pek theih malsawmna lian ber hi ‘hriselna’ a nih vang a ni.
ZU NGAWL
Zu ngawl an vei hmâ bik em em a, chumi ina a hrin chu thihna a ni. Mipa ngawl vei te aiin a let hnih zetin an sâng zawk leh-nghal. Tin, heng vanduaina chi hrang hrang: lirtheia chetsualna te, mahnia intih-hlumna leh tharum thawhna angahte hian percentage hi mipa aiin a sâng lawr lak.
‘THIN’ A CHHE VEK THEI
Zu hian Thin hi a khawih chhe nghal rum rum thin a, hmeichhiate hian an tuar nasa lehzual.
HNUTE CANCER
Zu hian direct-in Hnute cancer thlen chiah lo mah se, zirchianna atanga a lan danin, Zu in nasat hian Hnute cancer lo awmna turah a thawh hlawk hle.
RIHNA PUNG
Zu-ah hian calories a tam em avangin mi mawl ber tan paw’n ‘thau’ a siam tih hriat loh chi rual a ni lo. A then chuan, ‘Beer Belly’ te an ti a, Zu in tam vanga Dul in hmasawnna duhawm lo tak a neih hi thil chhuanawm tak chu a ni lo chiang.
TAKSA KHAWL A TIBUAI
Hriselna tan a tha lo a ni mai lova, taksaa cell pawimawh tak tak a tichhe hmiah hmiah thin a, ngawl vei tih mai loh a dang zawng chu chhiat rupna a ni ringawt. Zu hian vitamin, proteins leh calcium hnathawh a ti su kuk vek a, chu chuan vun ro leh no lo tak tak mai bakah sam a ti mawi lo nasa nghal hle a, luphut leh arngeng a tam hmâ hle bawk.
NATNA DO LET THEI LO
Zu hian taksa mamawh hrang hrang a dan pin thin avangin natna ho te te nia langte pawh taksa hian a bei let thei tawh lova, hmelhmang leh lan dan a tithu vek a, harhvang tak leh in fit taka awm chu ‘ka ha se’ a ni.