Aizawl: PWD leh Central YMA-in thawh dunna thuthlung (MoU) a tum thum nan an an ziak thar leh.
PWD leh Central YMA-in thawh dunna thuthlung hi June 14, 2018 khan a hmasa ber atan an ziak a. A tum hnihna chu July 14, 2022 khan ziah lehin tun tuma an ziak thar leh hi a tum thumna niin, kum thum chhung awh ang.
Inremnaah hian PWD aiawhin Engineer-in-Chief H. Zoramliana leh Chief Engineer (Planning), C. Lalthlamuani ten hming an ziak a; YMA aiawhin Central YMA President Lalhmachhuana leh General Secretary Prof. Malsawmliana ten hming an ziak a ni.
- Thawh hona thuthlung chu:
- Hnathawh tur lian zual deuhah bul tan a nih hmain a bialtu PWD hotute ruahmannain hnathawhna tur huamchhunga YMA Branch/ Group/Sub- Hqrs. hruaitute nen project nihphung, hnathawh dan tur leh tul dangte inhrilhfianna neih thin ni se.
- Project intanna leh tawpna, a paltlang kawng/khuaah te detailed information PWD in a duan angin Informatory Board, PWD senso in tar thin tur a ni a, a venhim hi YMA mawh a ni ang.
- Hnathawh laiin, hun remchangah PWD leh YMA hruaitu ten Joint Inspection an nei ho ang a, a tul dan a zirin bialtu MLA/sorkar hotu dang leh NGO dangte pawh sawm theih a ni ang.
- Hna tha lo a awm chuan YMA-in a mala hma la mai lo vin, bialtu EE/SDO te nen sawi ho a nih hnuah department-in contractor-te hi instruction pek thin tur a ni ang.
- Kawng siam mek tikhaihlak zawnga khawsa leh harsatna siam an awmin, YMA leh department-te inrawnin a tul angin hmalak a ni ang.
- PWD kawngpui leh side drain-te a him theih nan a tul angin Branch YMA in an huam chhungah guideline for road safety chungchanga zirtirna an pe thin ang.