Afghanistan-a UN tana thawk Afghan hmeichhia eng emaw zatin thaha vauna an dawng niin UN report thar berah tar lan a ni a, he ramah hian kum 2021-a Taliban-in thuneihna an chan leh hnuah an zalenna rah behsak a ni nasa hle.
UN mission chuan an hmeichhe hnathawkte hian May thla khan thaha vauna hi an dawng nasa hle tih Pathiannia Afghanistan-a mihring dikna chanvo dinhmun an tihchhuahah an tar lan.
Report-ah hian Taliban chuan UN hnenah hian heng vauna hi an mite tih a nih loh thu leh interior ministry-in a chhui mek tih an hrilh tih tar lan a ni.
Interior ministry thupuangtu, Abdul Mateen Qani-a chuan eng vauna mah an siam loh thu sawiin, “Heng thil hi a dik lo vek a ni,” tiin The Associated Press news agency a hrilh.
“Ministry chuan hemi atan hian department hran kan nei a, an himna atan leh vengtu turin ruahmanna neih vek a ni a, tute mahin mi an tihthaih leh vau a theih loh,” tiin an chhuiona chungchang a zawhnaah Qani-a chuan a sawi.
Report-ah hian mi tu tih hriat lohten UN Assistance Mission in Afghanistan (UNAMA), agency dang leh programme-a thawkte an vau tih tar lan niin ‘UN hian a hnuaia thawkte himna tura ruahmanna a duan a tul’ tih tar lan a ni.
Taliban hian Afghan hmeichhiate chu tual chhung leh ram dang sorkar ni lo pawla an thawh hi December, 2022 atang khan khapin a hnu thla rukah a pawt sei leh a. Hmeichhe chhawrtu agency leh pawl chu khar zel turin a ti a. Puitu pawl leh thlawmngai pawlte chuan Taliban hian an hna thawh an tibuai hle nia an sawi laiin thuneitute erawh chuan an pha thung.
UN report hi Afghan hmeichhiate thaha vauna sawi chhuahna hmasa ber a ni a. Report-ah hian kawng dangah pawh hmeichhiate zalenna leh himna a chhe hle niin an sawi a. Vice & virtue ministry-a inspector-ten hmeichhiate chu an taksa pum inkhuh turin an ti a, hijab chauh inbelte chu an man zel a ni.
Hmeichhiate hi vantlang hmuna an kal pawh khapsak an ni.
August, 2024-a UN report chuan Afghanistan-a Taliban sorkar hian kum thum chhung thuneihna an chelh atangin hmeichhe naupang maktaduai 1.4 velten lehkha zir theihna zalenna an neih chu an tichhia niin a tar lang bawk.
April, 2023-a Unesco-in a chhiatnaah hmeichhe naupang 3,00,000 chuang sikul lut zui lo an awm a, an hma hun a ngaihtuahawm hle niin an sawi.