Aizawl: Home Minister K. Sapdanga’n Mizoram Universal Health Care Scheme (MUHCS) chu duhthusama a kimchan tawk loh avangin a ennawntu tur, Review Committee din a ni tih a sawi.
Inrinni khan Home Minister hian Lungleia Kohhran enkawl damdawi in pahnih, Christian Hospital, Serkawn leh John Williams Hospital te a tlawh a; Mizoram Baptist Kohhran enkawl Christian Hospital a tlawhnaah BCM hnuaia Medical & Health Department Director Dr B. Laldinliana leh damdawi ina thawktuten lo dawngsawngin, an hma lakna hrang hrang an lo hrilh fiah a, thawktute nen an inkawm bawk.
Thawktute nen an inkawmnaah Christian Hospital-in MUHCS an zawm avanga lawmthu sawi tur leh sorkar tuam mawitu hmasa an nih avanga tlawh a nih thu a sawi a. MUHCS-a siam rem leh ennawn ngaite lo zir chiang tura din, Review Committee-ah chairman-a ruat a nih thu a sawi a. MUHCS chu Mizoram mipuiin buaina awm lova an chhawr tlan theih thuai a beisei thu a sawi.
Christian Hospital hian kumin May 21 khan MUHCS hi an tan a, tun dinhmunah damlo 786 enkawl tawhin sorkar atangin damlo enkawlna senso Rs nuai 151.75 an hmu tawh a, chawhrualin chawlhkar tin Rs nuai 13.2 vel hmu thin ang an ni.