Inrinni khan Mamit district chhunga awm Saikhawthlir khuate rubber phunsa leh phun loh tam tak chu Assam police leh Assam forest lam miten an tichhia a, boruak a sosang thelh a ni.
Hemi chungchangah hian Mizoram police te pawh report an dawn bawhzuiin an kal tawh na a, mahse an hawsan hnuah buaina nasa zawk a chhuak leh mai ang tih hlauhawm tak a ni.
Saikhawthlir hi Assam ramri dep a awm a ni a, a chhehvel khuate nen hian tun hma atangin Assam lam atanga tih buai hi an lo tawk fo tawh a, kan ram chin hum tlattute an nih miau avangin ngaihthah an thiang lo a, sorkar hian a ngaihven a, venghimtu tur a dah leh thuai thuai pawh a tul hle.
Saikhawthlir bul mai Chuhvel ah IR te awmna, Branch Out Post (BOP) te chu awm ve bawk mah se, mihring an indaih lo hle nia sawi a ni a, chuta karah damlohna avanga chawlh la laite an awm bawk.
Hun hmasa lamah Assam nen kan lo inkap tawh a, khami tum khan Mizo mipuite kha sorkar lamah kan tang vek a, an huaisen em avangin. Tuna kan sorkar hrawn mek pawh hi hetiang hunah hian mipui mit fukna an ni leh ngei dawn. Tlanchhe chunga dawih aw chhuah chi a ni lo a, chutiang rilru pu chu mipui pawhin kan hre thei khawp. Huaisen takin ding se la, ramri duty dah belh ngei bawk se. A tul anga silai hmetpuak thei tur thlengin a sipaite chah bawk se a va thlamuanthlak lehzual dawn em.