Aizawl: Chief Minister Lalduhoma hovin nimin khan Aizawl Sustainable Urban Transport Project (ASUTP), Project Readiness an sawiho.
CMO-a thutkhawmah hian UDPA Minister K. Sapdanga chuan Aizawl zau chho zel mila khawpui chhung inkalpawhna tur ruahmanna an siam dan a sawi fiah a. A senso hi Asian Development Bank loan tinzawn niin, state sorkar tana hautak lutuk lo tura duan anih thu a sawi.
UDPA Secretary Lalmalsawma Pachuau pawhin Lengpui Airport huamin Aizawl tlak lam pangah mihring chenna a zau thla zel tura ngaih a ni a. Muallungthu atanga Sihphir huama khawpui inkalpawhna ruahman niin, Kulikawn leh Bawngkawn inkar corridor leh junction tihhmasawnna te, Temple atanga Vaivakawn kawngpui leh a chhehvel tihhmasawn leh junction siam that te, Aizawl tawntirh hmun pathuma truck, bus leh maxi cab terminal lian siam te, kawngpui thlan bik pahniha EV bus tlantir a, chung bus-te chawmtu tur EV feeder bus khawpui chhung kawng thlan bika tlantir te a nih thu a sawi.