Aizawl: Sports Minister Lalnghinglova Hmar chuan Mizo thalaiten infiammite tana sipaia an luhna tur buaipui zel a nih tur thu a sawi.
Thawhtanni khan Champhai South bialtu MLA Lt. Col. Lalhmingthanga nen a pisaah inkawmin infiammite tana sipaia an luh dan tur an sawi dun a. Sports & Youth Services Department leh Mizoram State Sports Council kaltlangin sports association-te chu infiammi, sipaia tang theite zawnga an hming thehlut tura ngen leh hriattir an nih thu te, sports quota bikah kum dangah Mizoram atanga lut an awm ngai meuh lo va, kuminah mi 12 tling tawh thu leh tlin belh thei an la awm zel chu lawmawm a tih thu minister chuan a sawi a, kum dangah pawh infiammite tana sipaia an luhna tur buaipui zel a nih tur thu a sawi bawk.
Sipai lak pangngaiah pawh screening leh inzirtirna mumal tak neih a nih avang hian kum dang aiin document fel lo leh thil hriat sual vanga buaina a tlem a. Nikumah Mizoram atanga mi 57 an tlin laiin kuminah mi 163 an tling tawh a, mi eng emaw zat tlin belh thei dinhmuna an la ding chu lawmawm an tih thu sports minister leh Champhai South MLA chuan an sawi.
August 11-13, 2025 chhunga Shillong-a Assam Regiment laknaah sports quota kaltlangin Mizo infiammi 12 an tling a; mi dang pathumin medical review an nghak mek a. Sipai pangngai (Agniveer)-ah pawh Mizoram atangin mi 163 tling tawhin, mi dang 39-in medical review an nghak mek bawk.