Chief Minister Lalduhoma chuan term khat chhung chuan an hmachhawp tam tak hi a puitling hman dawn lo tih a sawi.
Thawhtannia ZPM party-in an party pisa-a chhung inkhawmah thu sawiin chief minister chuan sorkar hmasa hun laia finance department hriatpui miah lohva committed liabilities Rs vbc 100 chuang pek an ngai a, finance department hian sum hmanna zawng zawng lutchhuak an hre vek tur tih sawiin, “Hemi hi finance-ah allocation an dil lo a, administrative approval an la lo va, expenditure sanction pawh an dil lo va, work order pawh awm lova hnathawh a lo tam lutuk a. Chung ho chuan, ‘hei ka bill’ tiin an rawn theh lut a, kan sorkar hnua project thar atana sum kan dah te a ei hek a. Chuvang chuan department reng reng project thar atana sum kan ruahman hi commited liability atan hman kan rem ti tawh lo va. Committed liabilty atan a hranpaa sum kan pe thei a nih chuan kan pe ang,” a ti.
Chief minister chuan kawng chungchangah la siam zawh loh theh darh ching te, a tha sa tichhiaa ZPM sorkar tihmualpho tumte an awm tih sawiin, “Kum tam tak chhunga an lo tih theih loh kum khat leh thla riat chhunga felfai vek tura min beisei hi chu a dik bik lo va. Opposition party-te pawh hian mipuiah insawi ba ngam ve rawh se, ‘Keini chuan heti hian kan ti ang’ tihte hi sawi ve ngam se,” tiin, an beisei chu kalphung tharin hma an hruai ang a, party dangin el se, a tha zawngin an inel ang a, ram pawhin hma a sawn phah dawn a. Chutiang awm si lova insawichhiat ngawr ngawr hi thil dik a ni lem lo tih a sawi.
Pathianin ZPM pawh ram kaihhruaina kawngah tih tur a pe a, mite beiseina zawng zawng an tihhlawhtling vek seng kher dawn lo tih sawiin Lalduhoma chuan, “Term khat chhung chuan kan hmachhawp tam tak hi a puitling hman dawn lo. Amaherawhchu, Pathian hmaa kan intiamna chu he ram rorelnnaah hian Pathian ram tun din a ni a, hei hi Pathian leh mipuiten min tehna tur pawh a ni,” a ti.
Chhung inkhawm hi ZPM President Lalliansawta’n a kaihruai a. Tun hnaia Chief Minister Lalduhoma’n Doctor of Letters (Honoris Causa) a dawn chu ZPM General Headquarters hmingin lawmpuina thil pek VL Zaithanzama, MLA-in a hlan bawk.