Rajasthan nula Manika Vishwakarma chu Miss Universe India 2025 atana thlan niin, nikum lama he dinhmun lo chelh tawhtu Rhea Singha chuan crown a khumtir a, Manika hian kumtawpa Thailand a Miss Universe thlanna neih turah India ai a awh dawn a ni.
August 18, 2025 zan khan Jaipur, Rajasthan-ah grand finale neih niin, contestants 48 zet inlan zingah Manika Vishwakarma hi Miss Universe India 2025 atana thlan a ni a, first runner-up ah Uttar Pradesh nula Tanya Sharma thlan a ni a, second runner-up atan Haryana nula Mehak Dhingra thlan niin, Amishi Kaushik chu third runner-up a ni bawk.
Miss Universe India 2025 Manika hi Rajasthan-a Sri Ganganagar a piang niin, tunah hian Delhi lamah a khawsa mek a, political science leh economics subject final year zirlai a ni bawk.
Mizoten beiseina sang tak nena kan thlir Mizoram aiawhtu Evelyn Zachhingpuii Chhakchhuak erawh chuan top 20-ah a zinkawng zawh tawpin, a ler thleng lo mah se a zin kawng hi a ropui a, a chhinchhiahtlak hle thung.