Aizawl: Chief Minister Lalduhoma chuan Union Home Minister Amit Shah hnena a dil angin, Border Security Force (BSF)-a Mizo thalai 300 lakna tur advertisement tihchhuah a ni ta chu lawmawm a tih thu a sawi.
Chief minister chuan a Facebook account kaltlanga lawmthu sawiin, BSF-ah Mizo mipa 255 leh hmeichhia 45 lak a ni tur chu lawmawm a tih thu a sawi a. Advertisement hi thalai sipaia tan tum ten ngaihven turin a chah.
Chief minister hian India sipai (Armed Force) Agniveer lakna hi kalpui mek a nih thu sawi bawkin, MLA Lt. Col Clement Lalhmingthanga’n a vil reng thu leh a diltu Mizo thalai 1,000 chuang atangin medical paltlang hi 163 an awm thu leh, medical review ngai, beiseina sang tak neihna 39 an awm thu te, Sports Minister Lalnghinglova Hmar thahnemngaihna zarah infiammi quota atangin 12 an tlin thu leh medical review ngai pathum awmin, an vaia an tlang chuan tun Agniveer recruitment-ah Mizo thalai 200 chuang an tling dawn tih a tar lang.
Mizo Territorial Army (Home & Hearth) hi kumin November thlaah mi 70 lakna kalpui a nih dawn a, he hna dil tum tan MYC biakpawh theih reng an nih thu leh Territorial Army hi nakum lamah pawh lak belh zel theih an beisei thu a tar lang bawk.