Aizawl: Maubawkah pitar kum 80 mi rawng taka thah a ni.
Thawhlehni chhun dar 12:30 vel khan Maubawk Kawn venga cheng, Runliani (80) chu a chenna inah rawng taka thah a ni a, a hrawkah chema zaina hnuhma hmuh a ni.
Thudawn danin Runliani hi an chenna ina eichhawp dawr nei a ni a. Chhun dar 12:30 vel khan an dawra thil lei tuma kalin in hi a inkalh avangin an ngaih tha lovin an enchiang a, in chhungah a ruang hi an hmu a, puanin a lo inkhuh vek a ni.
Runliani hi a hrawkah zai a ni a, an in rawk tumtuten an that ni ngeia ngaih a ni a. Pawikhawihna thlen thu hi khawtlang hruaitute hriattir an nih hnuah police lam hrilh nghal a ni a. Thil buaipui ngai hrang hrang police leh forensic lamin an buaipui nghal.
Runliani hi a fanu leh a tupa nena khawsa niin, an inhnuaiah a fapa a cheng bawk a, an chenna in piahah huan an nei a, huan a a fanu a kal hlana thil thleng nia ngaih a nih thu dawn a ni.