Aizawl: Food Civil Supplies and Consumer Affairs (FCS&CA) Minister B Lalchhanzova’n nimin khan Aibawk Supply Godown leh Aibawk-Darlung kawng, Tlawng lei bula lei tlahniamte a hmuna a enfiah. Kanghmun tlangdung mipuite chu thlamuang taka awm turin a chah.
Godown a tlawhnaah supply minister chuan, khuarel chhiatna thleng thin chu tu thiamloh mah a nih loh thu leh lei tlahniam tuartu ram neitute, he kawngin a chawm khuate a tawrhpui thu a sawi a. Mipuite harsatna thleng thei sutkian thuai dan ngaihtuahin sorkarin a tih theih ang ang ti nghalin theihtawp a chhuah thu leh PWD Minister pawhin a ngaihven reng thu sawiin, Kanghmun tlangdung mipuite chu thlamuang taka awm turin a chah.
Aibawk PDC Supply Godown huamchhungah hian khaw paruk – Aibawk, Maubuang, Phulpui, Sateek, Tachhip leh |hiak khuate an awm a, ration card zawng zawng hi 1,563 a awm mek a, beneficiaries 6,734 an awm bawk.
August 2025 hian Aibawk Godown-ah buhfai dahkhawl quintal 1432.90 a awm a, hei hian October 2025 thleng sem tur a daih a ni. Aibawk hi Monsoon Stock Centre a ni lo chungin sorkar hmalakna zarah stock pawh a tam lai tak a ni nia sawi a ni.
August ni 5, 2025 khan Aibawk leh Darlung khaw kar kawngah hian lei khi chat hmuh a nih ni la lain, PWD hotute’n enfiah nghalin kawng chhan theih dan tur ruahmanna siam a ni a, report leh estimate pawh hemi ni hian thehluh nghal a ni. Hetih laia estimate hi Rs. 31.00 lakhs a ni a, Work Schedule-a telh tura hmalak a nih mek laiin, August ni 14, 2025-a ruah sur tam lutuk avangin helai hmun hi a mual chawpin a min ta a, kawngpui (pavement) pawh meter 200 vel a minpui a. August ni 15, 2025-ah PWD hotute’n a hmunah kalchilhin kawng thar siam dan tur enho a, hemi ni vek khaw thim hnuah survey hi zawhfel a ni.
Tun dinhmunah kawng thar hian mual chimna chhakah lung bang thiah phei mai nise tiin rel a ni a, tuna kawng awmsa a nghet tha laiah rawn pawh thla leh tura ruahman a ni.