Aizawl: Tun hnaiah Assam state atanga Mizorama luh tum an thahnem avang hian, Mizoram luhkaa police station check gate-ah Inner Line Permit (ILP) siam hna pawh ngawrh taka kalpui mek a ni.
Nimin chawhma khan Kolasib Bawrhsap Robert C. Lalhmangaiha chuan Zophai leh Phaisen-a Mizoram leh Assam inrina chu tlawhin, Bairabi leh Phaisen Police Check Gate-a ILP pekchhuahna a enfiah a. Tunhnaiah Assam atanga Mizoram chhunga luh tum an thahnem thin avangin, Mizoram luhka a Police Station Check Gate-ah ILP siam hna pawh ngawrh taka kalpui kawngah, ILP chu fimkhur zawk leh felfai taka pekchhuak a tul thu a sawi.
Bairabi leh Phaisen Police Check Gate a tlawhnaah, Check Gate-a thawktute chuan sponsorship nei lo leh document felfai tak nei lote chu ILP pekchhuah an nih loh thute Kolasib bawrhsap hnenah an lo hrilh a ni.
Kolasib bawrhsap hian Bairabi khaw chhunga 2 Lane kawng siam chungchangah Land Owners Association hotute kawm nghalin, National Highway 154 siam meka ram neituten zangnadawmna chungchanga harsatna an tawhte sawi hovin hmalak dan tur an rel ho a ni.