India-in furpui hun a tawn mekah state hrang hranga a thawh dan a inang lo hle a, ruah sur zat pawh a inang lo hle a, hetih lai hian a sur dan thin pangngai aia tam erawh a sur tawh.
India Meteorological Department (IMD) Senior Scientist Dr. Naresh Kumar-a chuan an chhinchhiahna thar berah chuan Thawhtanni thleng khan ram pumah fur ruah sur thin pangngai aia 4%-a tam a sur tawh niin a sawi a, met subdivision tam zawkah a nih dan aia tam a sur hlawm tih an dawng tih a sawi.
Ruah sur tam berna chu Himachal Pradesh niin kum dang aiin a sur tam tawh zawk hle a, hetih lai hian Bihar leh hmarchhak state-ah te a la sur tlem rih niin an chhinchhiah.
Himachal Pradesh-a Kangra, Una leh Chamba district-ah chuan a sur tam uchuak hle a. Ni hnih chhung han nei miah lova sur chang pawh neiin hei hian tui lian pawh a siam nasa hle.
Shimla-a Meteorological Center chuan Thawhtanni leh Thawhlehni pawh khan ruah sur tam tura sawiin red alert a tichhuak a, a sur tam leh viau bawk.
Lei min avangin National Highway pathum telin kawngpui 625 kar a ni a. Ruah sur nasa avangin district pariatah zirna in khar a ni a ni a. Electric transformer 1,533 leh tui lakna 168 a chhiat avangin nun a tibuai hle a ni.
Shimla-a Meteorological Center scientist Sandeep Kumar Sharma chuan, “Fur hi he state-ah hian a la che na hle a ni,” a ti.
Bilaspur, Chamba, Mandi, Solan leh Hamirpur district-ah ruahpui vanawn a sur a, tun thla tawp thleng la sur zui viau turin an la sawi lawk bawk.
Himachal Pradesh-ah hian State Disaster Management Authority-in a chhinchhiah dan chuan kumin fura khualrel chhiatna thleng avangin mi 303 an thi tawh a, mi 360-in hliam tuarin chenna in 1,212 a chhe tawh bawk.