Aizawl: Speaker Lalbiakzama kaihhruaiin nimin khan ni hnih awh tur Mizoram Legislative Assembly fur thutkhawm chu neih tan a ni.
Asssembly fur thutkhawm tanni hian session neih hnuhnung ber leh tun session inkara ram hruaitu kalta pahnih, parliament leh state assembly-a member lo ni tawh – Rajya Sabha MP hlui Ronald Sapa Tlau leh Dampa bialtu MLA Lalrintluanga Sailo te sunna hun hman a ni.
House Leader Lalduhoma chuan ram hruaitu boral ta pahnih sunna hun hmangin an chanchin a chhiar chhuak a. He’ng member an sunte hi an ui takzet tih sawiin, an sulhnu tam tak a awm thute, eng party pawh sorkar se, sorkar dinglai chuan member chatuan ram pan ta chhungkuain harsatna leh mamawh hrang hrang an neihte tihsak turin an inhawng reng tih a sawi a ni.
Leader of Opposition Lalchhandama Ralte pawhin ramhruaitu pahnihte House zahawm takin sun a ngai ta hi lungchhiatthlak a tih thu sawiin, Mizoram tan channa nasa tak anih thu a sawi.
Speaker Lalbiakzama chuan ram hruaitu sunna thu sawi turin Legislature party aiawha thu sawi tura a sawm angin BJP legislature party aiawhin Dr K Beichhua, ZPM legislature party aiawhin VL Zaithanzama, MNF legislature party aiawhin Robert Romawia Royte, INC legislature party aiawhin Ngunlianchunga te’n sunna thu an sawi a ni.
Sunna thu an sawi zawh hnuah hnuah Speaker Lalbiakzama kaihhruaiin minute khat chhung ngawi renga dingin an sun a ni.
Session tanniah hian Speaker Lalbiakzama chuan Panel of Chairman mi pali ruat an nih thu a sawi a, Lunglei West bialtu MLA T. Lalhlimpuia, Mamit bialtu MLA H. Lalzirliana, Tuirial bialtu MLA K. Laldawngliana leh Tuichawng bialtu MLA Prova Chakma te chu Panel of Chairman atan ruat an nih thu a sawi bawk.
Session hi vawiin hian neih chhunzawm leh a ni ang.