Nilaini zana Carabao Cup second round-a Grimsby an hneh loh hnuah Manchester United manager Ruben Amorim-a chuan an khel chhe tak zet tih a sawi.
Blundell Park-a inkhelah hian hun pangngaia 2-2-a an inhnehtawk hnuah penalty petah mual neitu hian 12-11-in hnehna an chang.
Grimsby hi League Two team an ni a, Premier League hnuai fe, 4th division an ni a. 4th Division club-in a vawi khat nan an hneh a, hei hi United-in record chhia an neih thar chu a ni.
Tun season-ah Premier League vawi hnih an khelh tawhah hnehna an chang zo lo ve ve bawk.
Inkhelh zawhah United boss Amorim a hnual hle, “Kan khel chhe hle a, kan khelh danah khan thil dik lo chiang takin a rawn lang chhuak, tihdanglam ngai kan nei tih a chiang ta a ni,” a ti.
“Team pum pui a bân theih loh va, manager hi bân theih chu ka ni a. Kan result khan min thawng hle a, ka hnual em em bawk. Kan khelh danah khan sawi tur ka nei lo, thil dik lo hi ka sawifiah vek thei lo a ni,” a ti.
“Kan tihsualna ngaiah kan tisual leh thin a, min tantute lakah pawh a inthlahrunawm a ni. Kan khingpuite khan inkhelh an thunun a. A tir atangin kan game a tang tawk lo va, inrintawkna an nei lo a, tihngaihna an hre lo hlawm bawk a ni,” a ti.
“Chak lo mah ila hmasawnna hmuh tur a awm hi chuan a lawmawm thin a; mahse, zanina kan khelhah kha chuan thil lawmawm hmuh tur engmah a awm lo, kan buaina hi a hmaa kan buaina tho a la ni e,” tiin a sawi.