Aizawl: Social activist Vanramchhuangi hovin mi thenkhatin nimin khan Forest Conservation (Amendment) Act, 2023 pass duh lohna an lantir.
Assembly session neih zawh takah Nilaini khan Environment, Forest & Climate Change Minister Lalthansanga’n sorkar laipuiin Forest Conservation Amendment Act, 2023 a pass chu Mizorama hmang ve tura official resolution a pu lut a, sawiho hnuah pawm a ni.
Forest Conservation (Amendment) Act, 2023 hi ram venhimna kaihhnawih leh hmasawnna hna thila ram chhung khawi hmun atang pawha ramri atanga km 100 huam chhunga hma lak theihna tur a ni.
Act pass thar duh lohna lantirin, social activist Vanramchhuangi leh mi thenkhatin Assembly House gate bulah an pungkawm a. Thuziakte kengin Forest Conservation (Amendment) Act, 2023 an duh loh thuten an au rual a ni.