Mizote hi kan khawtlang nun leh mizia hrim hrimah kutdawh ngai lo hnam kan ni a, chutiang mi tur an lo awm a nih pawhin kan inpuitawnin, theitawpa dawmkang thin hnam kan ni.
Kan pi leh pute atanga kan inthlahchhawn zel he mize duhawm tak hi a mawi a, chhawm nun zel pawh a tha hle.
Hetih lai hian tunhnaiah vantlang hmuha kutdawh ta mai, a then vak kual a, a then thutna bik nei an tam ta hle mai a. Enfiah ngai tak an ni reng a ni.
Hetiang a nih avang hian Assembly session nilainia neihah chuan Social Welfare minister in “The Mizoram Prohibition of Beggary Bill 2025” chu pulutin, vote hmanga pawm a ni ta a. Kan ram leh hnam tan a tha hle turah ngai phawt ang.
Bill puluttu sawi danin Aizawlah ringawt pawh hian kutdawh 30 chuang hmuh tur an awm a, Mizo dik tak ni lo leh Mizoram mi leh sa ni lo an awm nual bawk. A lehlam zawnga ngaihtuah chuan heng mite hi kan ram hmel tibaltu an nihna chen a awm tlat a ni.
Sorkar hian dik taka vilzuiin, kengkawh se la, Mizote hi chuan kan thenawm leh hriatchiante tanpuina kawngah hian theihtawp kan chhuah tha viau. Mahse, dan anga hman tur a nih takah chuan her rem ngai leh la khawng tak tak rem lohna lai pawh a awm ngei ang. A tul ang zelin mipui lam rawn thiam thung se a tha awm e.