Aizawl: Agriculture & Farmers Welfare changtu minister, PC Vanlalruata sorkarin sawhthing lei nan (support price atan) Rs vbc 70.19 a sen tawh thu leh sum a sen atang hian Rs vbc 12.78 hmuh let a nih tawh thu house a hrilh.
Nimina assembly session zawhna leh chhanna hunah Lawngtlai West bialtu MLA C Ngunlianchunga zawhna chhangin A&FW minister chuan, February 29 leh June 30, 2025 inkar khan sorkarin sawhthing a lei tih a sawi a. August 16, 2025 thlenga report khaikhawmah chuan quintal 3,45,932 lei tawh tih a sawi.
Zawhna chhanna pek a nih hnuah Siaha district-ah 73,56,246, Champhai distrist-ah 17,55,19,533 leh Saitual district-ah 6,81,11,139 release leh tawh tih a sawi.
Phase-1: February 20 leh April 20, 2025 chhung khan kg khat Rs 50 zelin Secondary Collection Centre (SCC)-ah a lei a. Phase-2: April 21 leh June 30, 2025 chhunga SCC a lei chu company/sumdawng hnenah auction hmangin an hralh chhuak a, kg khat Rs 50 a tlin lohna zawng (support price) hi sorkarin a hralhtu farmer hnenah a pe tih a sawi.
Sawhthing leite hi hralh chhuah leh nghal zel an nih thu sawiin A&FW minister chuan, “Auction Notice tihchhuah niin a chhang sang apiang hnenah hralh leh nghal zel a ni,” a ti.
PC Vanlalruata chuan sorkarin sawhthing lei nan (support price atan) Rs vbc 70.19 a sen tawh thu sawiin, sorkarin sawhthing lei nana sum a sen hmuh kir vek a ni tih a sawi a. Sawhthing lei nana sorkarin sum a sen atang hian Rs vbc 12.78 hmuh let a nih thu house a hrilh.
Support price vbc 45 vel la pe lo
Mizoram sorkarin sawhthing leina support price la pek loh Rs vbc 45 vel a la nei.
Ningania assembly session-a member-te zawh belhna chhangin Agriculture & Farmers Welfare Minister PC Vanlalruata chuan support price la pek tlak mai theih loh chhan chu a enkawltute mi fel ber ber an nih loh karah portal-a upload a ngaih avang te, a ching ve loten hlawkna tel an lo tum vang niin a sawi.
Minister chuan a bikin khawchhak lam, Burma ramri-ahte buaina an tawk nasa a, ching ve loten Burma sawhthing la lut a, an hralh tih a sawi a. Heng hi social audit atangin eng emaw zat an hmu chhuak tih sawiin Secondary Colletion Center dangte pawh a tirinhlelhawm phah tih a sawi a. Social audit an neih tawh atangin a pawisa zawng pawhin sorkarin cheng vaibelchhe tel an hum phah dawn nia a hriat thu a sawi.
PC Vanlalruata chuan, “A mi mal anga va dem theih chu ni viau mah se, a hun laiin khauh tawk lohna sorkar lam atang pawhin kan nei a ni mai thei. Theihtawpin awareness campaign kan nei chungin khawi laiah emaw pawp a lo awm a; chuvangin, payment pawh a kal tlai a ni,” a ti.
A hun taka payment an dawn loh chhan chu sorkarin Market Intervention Scheme (MIS) hi central an dil a, benefit transfer leh farmer-te account thlakte a ngai a, an account kaltlang vek a ngaih avangin payment a kal muang a. Chutih laiin, MIS atangin sorkarin eng emaw zat chu an hmu let dawn tih a sawi bawk.