Aizawl: Aizawl khawpui chhunga damdawi dawr pasarihte chu CCTV an la vuah loh avangin a an chunga a tul anga hmalak a ni dawn.
Aizawl District Magistrate Er. Lalhriatpuia’n kumtlinglo leh school uniform haten damdawi ruih nana hman chi an lei tur ven nana damdawi dawr (heng damdawi kawl pha chin)-ten an dawrah damdawi leitute lang thei tura CCTV vuah vek tur a nih thu order a lo siam tawh a. Hemi bawhzui hian damdawi dawrte hi nimin khan endik an ni.
Damdawi dawr endikna hi FDA (H&FW department) Executive Magistrate John Lalramhluna Hnamte hovin Drugs Inspector leh Police-te tangkawp chuan Joint Inspection an nei a. Civil Hospital, Aizawl chhehvela damdawi dawr 64 an endik a. A tlangpuiin pharmacy-te hian district magistrate thuchhuak an zawm that hle laiin, pharmacy zinga pasarihte chuan CCTV hi an la vuah loh avangin an chungah a tul anga hmalak chhunzawm a ni dawn.
Heng pharmacy endik zinga 31-te hian damdawi ruih nana hman theih chite leh antibiotic hralh fimkhur ngai bikte ziahna tur, Schedule H1 Register an vawng tha lo tih hmuh a ni a. Heng damdawi dawr zingah hian pharmacist thutchilh dawr 17 chauh an awm a, a dang zawngte hian pharmacist enpui lohvin damdawi an enkawlin an pe chhuak thin a ni tih hmuh a ni bawk.