MPCC Media department chuan nimin khan Aizawl Press Club-ah thu thar thehdarhtute kawmin ZPM kaihhruai sorkarin kum 2025-26 budget-ah Rs vbc 1,651.68 puk tura an in-budget laiin thla thum chhungin an puk tum zat zaa 71.35 lai an puk tawh tih an sawi.
MPCC Media Chairman Lalremruata Renthlei chuan RTI-a zawhna, finance department-in an chhanna document-a a lan danin ZPM hian sorkar an kutken tan, December, 2023 atanga June, 2025 thleng khan Rs vbc 6,214.27 lai an puk tawh a, kum khatah vaibelchhe 3,000 an puk tihna a nih thu a sawi.
ZPM sorkar hnua leibat tak tak chu Rs vbc 500 tihte hi thu dik tawk lo a ni tih sawiin, “CAG-in Mizoram sorkar sum dinhmun, unaudited provisional figure thla tin a tar lan thinah kum 2024-25 chhung khan Rs vbc 3,133.45 lai an puk a, budget-a puk an tum chu Rs vbc 1,365.70 a ni a, an puk tamna hi zaa 229.44 lai a tling a ni,” a ti a. Kum 2025-26 budget ah hian Rs vbc 1,651.68 puk turin an in-budget a, June thlenga CAG report an tihchhuah tawhah Rs vbc 1,178.53 lai an puk tawh a, thla thum chhungin an puk tum zat zaa 71.35 lai an puk tawh a, an puk hnem leh dawn hle tih a sawi.
“Hetianga an puk chhoh zel chuan term khat chhungin, ‘kum 40 chhung lo sorkar tawhten engmah an lo ti lo,’ ‘sum an puk tawk tawk a, mipui min dahkham’ titute hian Rs vbc 15,000 chuang an puk thei dawn a nih chu. Tuna kan leiba hi 2024-25 budget-a a lan danin Rs vbc 14,034.76 a ni a, hetiang zela an puk chuan kum 40 lo sorkar tawhten kum 40 chhunga an bat aiin ZPM sorkarin kum nga chhunga an puk hi a tam thei dawn tihna a ni,” tiin Lalremruata Renthlei chuan ZPM kaihhruai sorkarin leiba an rulh zel avanga leibat tlem hle anga an sawi thin chu chhut chian a ngai hle tih a sawi bawk.
Lalremruata Renthlei chuan CM leh minister-te hian a duh dan danin Mizoram sorkar sum dinhmun leh budget hi an sawifiah a, belhchian dawl lo taka an sawi thin hi thil dik lo tak a ni a, a pawi hle a ni. Hetianga ram kaihhruai hi dawt hmanga ram kaihhruaina nia an hriat thu leh sim vat se, thu dik hmangin ram kaihruai ve tawh tura an ngen thu a sawi.