Aizawl: Durtlang North Local Council hnuaia Local Health Sanitation Committee te ruahmannain faina kawnga hmalakna atan an vengchhung khawlaia plastic bottle ruak paih an lei khawm.
Durtlang North Local Council Health Sanitation Sub Committee hian an member-te sum thawhkhawm hmangin plastic bottle an leikhawm a. Plastic bottle liter 1 chunglam hi Rs. 2 zelin, liter 1 or 1/2 – Re. 1, liter 1/2 hnuai Re. 0.50 (duli) in lei a, sarang, appy/frooty bur ruak te kg ah Rs 30 in an lei a. Inrinni chhun dar 12 thleng khan Rs. 10,000 chuang man, motor trip li chuang an leikhawm hman a ni.
Durtlang North Local Council sum nena tangkawpin plastic bottle leina hun hi tum hnih an lo buatsaih tawh a. Rs. 10,000 chuang man bottle leikhawm a lo ni tawh a ni.
Durtlang North Local Council House-a plastic bottle leh sarang bakah frooty/appy bur ruak leikhawmna hi Aizawl Mayor Lalrinenga Sailo, AMC Ward No. 1 corporator ni bawk chuan hmanpuiin, Durtlang North Local Council in plastic bottle leikhawm nachang an hria chu ropui a tih thu a sawi a. Hei hi a tawpna tur a nih loh thu leh a bial chhung (Ward No. 1) a local council zawng zawng – Durtlang North bakah Durtlang, Durtlang Leitan, Leitan Ramthar, Zuangtui, Muanna Veng leh Selesih ah te kalpui vek a nih tur thu a sawi a. Local Council hmalakna hi AMC in theihtawpa a tanpui thin thu leh a tanpui zel tur thu a sawi bawk.
Aizawl Mayor hian a bial chhunga local council ten plastic an leikhawmna senso phuhrukna turin Rs. 10,000 theuh a pe a, a phurhna tur Garbage Truck a ruahman sak bawk a ni.