Aizawl: Sorkar laipui Ministry of Development of North Eastern Region (DoNER)-a Joint Secretary (NEC) Angshuman Dey chuan Lunglei district chhung Lungsen khuaa oil palm chinna hmun Inrinni khan a tlawh a. Oil palm chingtute harsatna leh mamawh hrang hrang a enpui.
DoNER Joint Secretary Dey hian oil palm chingtute dinhmun leh mamawh hrang hrang a enpui bakah, department hotute nen hlawk zawka oil palm thar chhuah a nih theih nana thil pawimawh hrang hrang leh hma lak dan turte an sawi ho va. Oil palm hralh chhuahna kawnga harsatna lian ber pakhat, a phurhna kawnga an harsatna sut kianna tur project ngaihtuah a nih tur thu a sawi.
Oil Plam chingtute nen an inkawmnaah Dey chuan Lunglei district chu oil palm chinna tur ram nei tha district a nih angin, awmze nei zawk leh tihtak zeta oil palm chin chu kalpui turin a chah a. An mamawh hrang hrangah inthlahrung lova department-a thawktute rawn thin tura chahin, kut hna thawktuten an harsatna leh mamawh hrang hrang a hnena an lo thlente chu a theih anga um zui a nih tur thu a sawi bawk.