Kumin February atanga July 27, 2025 thleng khan Mizoram sorkar chuan farmer-te sawhthing quintal 3,45,030.02 a lei tawh a. Sawhthing lei a nih theih nana senso hrang hrang atan Rs nuai 296.60 hman tawh a ni.
The Zozam Times -in RTI zawhna chhan a nih danin February, 2025 leh June, 2025 inkarah Mizoram sorkar chuan farmer-te sawhthing lei leh support price pek nan Rs. vaibelchhe 70.19 a seng tawh a. Sawhthing quintal 3,45,030.02 lei a ni a. Sawhthing lei a nih theih nana senso dang – administrative cost, transportation, packing materials, grading, loading leh unloading, auctioning, weighing, storage atan Rs. nuai 296.60 hman tawh a ni.
Secondary Collection Centre (SCC) kaltlang lova sawhthing lei leh hralhte hi sorkar record a nih loh avangin support price pek theih a ni lo tih tar lan a ni a. Sawhthing lei tan tirha buffer stock, Sairanga phurh khawm kha 17,438 qtls tihral a ni a. SCC tin atangin sawhthing hi hralh a ni bawk.
Sawhthing lak hun chhung hi khar ni tawh mah se, farmer-te hnenah support price hi pek kim a la ni lo va, pek chhuah mek a la nih avangin hlep/hloh zat hi sawi theih mai a la nih loh thu tar lan a ni bawk.
Sorkar thlai thlan bik buaipui tur hian village level/primary society hi 672 an awm a. Sorkara support price claim tur chuan SCC kaltlanga an hralh ngei ngei a ngai a, sawhthing dawn leh hralh zat record hi SCC-ah vawn a ni a, support price hi SCC-in District Agricultural Marketing Committee (DAMC)-ah an claim a, DAMC chuan sorkarah support price dilna an submit thin a ni.
Thlai thar lei nn/price support pek nan sorkarin 2023-24 khan Corpus Fund for Market Assurance of AgriHorti Commodities a din a, he fund-ah hian Rs. vaibelchhe 110.00 a dah a. Thlai thar lei/support price pek chungchang hi Bana Kaih (Handholding Scheme) hnuaia awm a nih angin, hemi atana sorkarin budget a ruahman atang hian thlai leina tur hi a tul anga hman mai tura ruahman a ni.
Hetih lai hian, Assembly session neih zawh takah Lawngtlai West bialtu MLA C Ngunlianchunga zawhna chhangin Agriculture & Farmers Welfare Minister PC Vanlalruata chuan sorkarin sawhthing lei nan (support price atan) Rs vbc 70.19 a sen tawh thu leh sum a sen atang hian Rs vbc 12.78 hmuh let a nih tawh thu house a hrilh.
A&FW minister chuan February 29 leh June 30, 2025 inkar chhung khan sorkarin sawhthing a lei tih a sawi a. August 16, 2025 thlenga report khaikhawmah chuan quintal 3,45,932 lei tawh tih a sawi a. Zawhna chhanna pek a nih hnuah Siaha district-ah 73,56,246, Champhai distrist-ah 17,55,19,533 leh Saitual district-ah 6,81,11,139 release leh tawh tih a sawi bawk.