Aizawl: Zirtawpni dar zan 10 vela Bawngkawnah insual buaina thlengah pistol-a mi kaptu, Rochhingpuia chu tualthah tum thubuai siamsak a ni.
Zirtawpni zan khan Rochhingpuia (44) s/o Haitinsanga, Bawngkawn Shalom veng leh Lalhriatrenga Siakeng (21) s/o Lalrawngbawla, Zotlang veng te chu an insual a. Rochhingpuia hian a motor-a pistol lain Lalhriatrenga Saikeng a kap a ni.
Lalhriatrenga hi a awm bawrah a paivat deuhin kah a ni a, a nakah a tlang a, silaimu hian a pumpui hmun hnihah a kap tlang a, a ril a pawp a, a thin leh rilpuite a khawih lo thung a. Lalhriatrenga hi Greenwood Hospital panpuia zai nghal a ni a, nimin lamah a dinhmun a kang sawt viau a, oxygen pawh phawi chhin niin, doctor-ten eng emaw emergency a awm loh chuan vawiinah ward lamah sawn mai theih a nh an ring a ni.
Pistol-a kaptu Rochhingpuia hi Bawngkawn Police-ten an man nghal a. Tualthat tum thubuai siamsak niin, Inrinni khan Central Jail-ah dah nghal nia thudawn a ni.
Hetih lai hian, Zotlang Local Council leh YMA chuan thuchhuah siamin pawi khawihtu hi ruihhlo (meth) zawrh avanga a awmna hmasa atanga hnawhchhuah tawh a ni a, ram leh khawtlang duh loh thila inhnamhnawihin khawpui lailia pawi a khawih ngam chu pawi an ti a, a phu tawk hremna hmu ngei se an duh thu leh hremna a hmuh ngei theih nan a tuartute chhungkua an thlawp tlat dawn tih an tar lang.
Bawngkawn Branch YMA leh Bawngkawn Shalom Veng pawhin, a kaptute chhungkua hi an chenna Bawngkawn Shalom veng atangin Inrinni zan dar 12 hmaa an veng chhuahsan turin an ti a ni.