Afghanistan khawchhak lama Thawhtanni tuka lirnghing avanga chhiatna thlengah hriat theih chinah mi 622 an thi a, mi 1,500 chuangin hliam an tuar bawk tih thuneituten an sawi.
Helicopter hmangin hliam tuarte phurh chhuah niin in chim chhe karah dam an awm leh awm loh dap mek a la ni bawk.
Taliban sorkar interior ministry chuan lirnghing magnitude 6-a na avanga chhiatna thlenga hliam tuar hi mi 1,500 an tlin tawh thu leh thi 622 an hriat tawh thu a puang a. A hma lawkin sorkar hnuaia Radio Television Afghanistan (RTA) chuan thi hi mi 500 chuang tiin a puang bawk.
Kabul-a damdawi in thuneitute chuan hmun kilkhawr tak taka a tuartute thleng turin hmanhmawh taka chet a ni tih an sawi a, he ram hian tun hma atangin lirnghing leh tui lian a tuar nasa hle.
Ministry thupuangtu, Sharafat Zaman chuan, “Damdawi in thenkhat chuan thi leh hliam 400 chuang an enkawl hlawm niin an insawi,” a ti a. An la pun ngei a rinawm hle tih thuchhuah a siamah a tar lang bawk.
Reuters Television-in thlalak a tihchhuahah chuan helicopter hmangin hliam tuar leh thite phurh an ni a, mi chengten sipai leh damdawi ina thawkte chu ambulance-a ruang hlanpuiin an pui bawk tih a lang.
Kunar province-a khaw pathuma in dingte chu lirnghing hian a sawi chhe vek a, hmun dangah pawh chhia a awm teuh bawk niin health ministry chuan a sawi.
Kunar province-a information hotu, Najibullah Hanif-a chuan thi 250 leh hliam tuar 500 an awm thu a sawi a, a zat hi la danglam thei reng a nih thu a sawi bawk.
A tirah chuan khaw pakhatah thi 30 an awm tih sawi a ni a, damdawi inah hliam tuar tam tak lak an ni bawk tih thuneituten an sawi.
Chhanchhuah hna thawktute chuan Pakistan nena an inrina, Khyber Pakhtunkhwa region-ah dam chhuak zawngin an buai hle a, heng lai hmun hi lei leh lunga in sak tamna niin zanlai vela lei hnuai km 10-a thuk atanga intan lirnghing hian a sawi chhe nasa hlawm hle.
“Tun thleng hi chuan ram dang sorkar atangin chhanchhuah leh chhawmdawl hna thawhnaa min pui tura inpe an la awm lo,” tiin Thawhtanni chawhma khan foreign office thupuangtu chuan a sawi.
Afghanistan hi lirnghing thlen duhna hmun a ni a, a bik takin Hindu Kush tlangdung, Indian leh Eurasian tectonic plate intawhna laiah a thleng duh zual.
Nikuma an ram khawthlang lama lirnghingah mi 1,000 chuang an thi a, khawvela ram rethei ber pakhat hi khuarel chhiatnain a tibuai hle a. An ram eibar dinhmun hniam tak sa chu khuarel chhiatna an tawrh thinte hian a tihniam zual hle thin.