Chinese hruaitu, Xi Jinping leh Indian Prime Minister Narendra Modi chuan Tianjin-a summit tan hmaa Pathiannia an inbiaknaah an ramri buai chin fel ngei an tiam a, thuk zawka thawhhona turte an sawi bawk.
Modi-a chuan kum 2020-a Chinese leh Indian sipaite ramria an intihbuaia an inkar a chhiat hle hnua a vawi khat nan China a tlawh a. China-in a din heng lai vela awm ramte politics, eibar leh himna atana an thawhhona, Shanghai Cooperation Organization (SCO) summit hmang tura kal a ni.
Modi-a chuan China nena an inkungkaihna chuan ‘awmze nei lam a pan’ tia sawiin ‘inrem lohnate tihfel a nih hnuah ramri-ah pawh boruak tha tak a awm’ tih a sawi bawk.
Indian foreign ministry-in thuchhuah a siamah Modi-a hian ‘ram pahnih inkungkaihna a that zel theih nan ramri a muana hahdam taka a awm chu a tul’ tih a sawi bawk tih tar lan a ni.
Xi-a pawhin Tianjin-a an inkawmna turin ‘rahbi thar’ a kaitir a beisei thu leh ‘inkungkaihna daih rei, hrisel leh hmasawnna tur a thlen’ a beisei tih a sawi niin an sorkar thu puanna, CCTV-in a tar lang.
Xi-a hian ram pahnihte chu ‘China-India ramri buai’ tih hmanga sawi fiah an phal lo tih sawiin eibara hmasawnna a awm theihna tur chu an ngaihtuahpui ber a nih zawk thu asawi bawk.
“Kan inkawpin kan tumah kan chian a, hmelma ang ni lova hmasawn theihna remchang kan inpek zel chuan hlauhawm ni lovin, China-India inkar hi a thangin hma lam a pan zel dawn a ni,” a ti bawk.
Tianjin-a SCO Summit hmang tur hian Russian President Vladimir Putin-a pawhin Pathianni khan a hmun a thleng a, Xi-a nen pawh an inkawm dawn.
August thla khan China palai lawk tak, Wang Yi chuan New Delhi tlawhin Asia ram lian pahnih hi an inpawh thar leh thu puan a ni a. Ram pahnih sorkar chuan ramri chungchanga inbiak thar leh te, visa pek chhuah leh thlawhna hmanga inthlawhpawh leh pawh an remti.
Wang-a’n India a tlawh lai hi US President Donald Trump-a’n India-in Russian tuialhthei a lei avanga bungrua a lak luhsakah chhiah 50%-a sang a lak tur a puan lai vel a ni a. New Delhi hian Beijing lam a awn zui ta hret hret a ni.
Modi-a hian Pathianniah khan, “India leh China hian ram inrelbawl hran an nihna an ve ve a, an inkara inkungkaihna awmah hian ram dang thlirna a ngai pawimawh lo,” tiin a sawi tih foreign ministry chuan thu a chhuah.
Kuminah hian China leh India sorkar hotu lawk an inzinpawh tam hle a, sumdawnna leh ramri kâna an mite chet velna an khuahkhirh thin pawh hlih hret hret dan an dap zel a. June thla khan Beijing chuan India atanga biakzinten Tibet-a hmun thianghlim an tlawh pawh a phalsak leh tawh a ni.