Aizawl: Education Minister Dr Vanlalthlana chuan ZPM chuan thui tak an lo zirchian tawh avangin sorkar kum khatnaah flagship programme an kalpui ngam thu a sawi.
Nimina ZPM party-in an pisaa chhung inkhawm an neihah thusawitu Dr Vanlalthlana chuan, eptu-te atangin beihna an tawk tam ta viau chu sepui ruah tawrh tlawk tlawk thei an ni bik lo tih a sawi a. “Mi tam takin ZPM-te research base-a kal lo leh kan insawi anga awm lovah min puh a, policy siamtute zingah ka tel ve hlauh avangin he sorkar hian research kan ti a, sorkar kum khatnaa flagship programme kalpui dang tunge awm? ZPM chuan kan kalpui ngam a, thui tak kan lo zirchian tawh vang a ni,” a ti.
Minister Dr Vanlalthlana chuan market chungchang hi a tlakhniam dan tur a hriat lawk theih a nih loh thu sawiin, “Kum 2019 khan sawhthing man chu kg khatah Rs.100 ni mah se, kuminah chuan kg khatah Rs.15-tea hralh a ngai thung a, hre lawk vek thei khawpa research tih theih ni se chuan ZPM Research team leh hnamdang mithiamho hi an millionaire vek tawh ang,” tiin, harsatna tam tak karah ZPM chuan a flagship programme a umzui nghal a, a pen nghal pawp mai a. Policy Drafting Committee an din a, chu chuan research based-in policy a duang a, an zin a, an zir a, mithiam an kawm a, a hma thei ang bera hman theih turin ruahmanna an siam tih a sawi.