Aizawl: Excise & Narcotics Department hnuaia Sub-Inspector pasarih leh Constable 10 lak thar, CTI-a Induction Training nei turte pualin Commissionerate of Excise & Narcotics-ah hun hman a ni a. Flag off programme hi Excise Minister Lalnghinglova Hmar chuan a hmanpui.
Excise minister chuan, “Mi pangngai aiin Excise & Narcotics Department-a a thawkte chuan zu leh ruihhlo in hmu tam zawk dawn a, mi pangngai aiin a let a insumtheih a ngai dawn. He department-a rei tak thawk tawh, zu leh ruihhlo a buai lo mi tamtak an awm. Anni entawnin thahnemngai takin in thawk dawn nia,” tiin zu leh ruihhlo man tura lak an nih angin an thil man tur zawk intihbuaitir lo turin a fuih.
Minister chuan sorkar hnathawk zingah transfer & posting a buai an awm thin thu leh, chu chuan midang a tihbuai tel thin avangin ching ve lo turin training turte chu a chah a. Excise & Narcotics department pawhin district hrang hrangah office a nei a, sorkarin a dahna hmunah tha taka thawk tura a beisei thu a sawi.
Training turte puala inkhawm hi Excise Commissioner Z. Lalhmangaiha’n a kaihruai a. Excise & Narcotics Commissioner & Secretary Vinod K. Pavle pawhin thu a sawi.
Induction training hi CTI, Sesawng-ah nimin atanga tan niin, thla ruk chhung an training dawn a ni.