Chief Minister Lalduhoma chuan Thenzawl Peace City chu Mizoramin khawpui mawi leh changkang tak a neih ve theih nan khawpui thar din an tum zawk thu a sawi.
Thenzawla village council, NGO leh khawtlang mipui tangrual chuan nimin khan Thenzawl Peace City lawmna inkhawm, Jt. YMA Hall, Bazar Vengah an buatsaih a, bialtu MLA Lalduhoma, Chief Minister chu khuallian niin Supply Minister B. Lalchhanzova chu khualzahawm a ni.
Thu sawiin chief minister chuan Mizoram hian khawpui changkang leh tun lai, fel taka duan sa a mamawh ve tawh tih sawiin, “Thenzawl hi chutiang din nan chuan a rem hle,” a ti.
Chief minister a nih hnuah prime minister nena an inhmuh tum hnihnaah Narendra Modi chuan a nunkawng a zawt tih sawiin Lalduhoma chuan, “Pi Indira Gandhi nena kan thawh dun dan te, IPS hna ka bânsan chhan te, MP zinga anti defection law hmanga paih hmasak ber ka nih chhan te chu Mizoram buaina a lo reh a, muanna a lo awm theih nana ka thiam ang anga ka beih vena vang a nih thute ka hrilh ve a ni,” tiin, India rama inremna hlawhtling ber zinga mi Mizoramin remna a nei ta a, state ralmuang ber a lo ni ta a. Planned city an nei bawk si lo va, mipui nuaih sawm chen theihna tur Peace City pe tura a dil tih a sawi.
Thenzawl Peace City chu Aizawl sawn tumna a nih loh thu sawiin, “Chutiang zawngin kan sawi ngai lo, Mizoramin khawpui mawi leh changkang tak kan neih ve theih nan khawpui thar din kan tum zawk a, Thenzawl tan bik pawh a ni lo va, Mizoram tan a ni,” chief minister chuan tiin, master plan siamna chauh pek an nih thu sawiin, a taka hmalakna tur hi an la ngaihtuah zel tur thu leh 15th Finance Commission sum chuang bâng, prime minister kuta awm mek chu dil an rilruk mek tih a sawi.
Chief minister chuan, “Kan hriat angin tun thla ni 13-ah Sairang Rel Station hi prime minister-in a rawn hawng dawn a. Peace City lungphum pawh a rawn phun theih kan beisei mek. Rel kawng hian Thenzawl Peace City hi thleng phei thuai se kan duh avangin hma kan la mek bawk,” tiin a taka an thawh hunah insenghawi a la tul nasa dawn a, mipuiten inhawng taka an lo dawnsawn a ngaih dawn thu sawiin, inbuatsaih turin a chah.
Khualzahawm Supply Minister B. Lalchhanzova pawhin thu sawiin, “Thenzawl hi hman atang tawhin khawpui a la nih tur thu mi tam takin an lo sawi tawh thin. Chu hun chu a takin a lo thleng dawn hnai ta a. Mipuite kan hlimin kan lawm hle. Thenzawl hi Bengkhuaia lal ram chhunga awm niin khawper a lo siam thinna a ni. Mary Winchester chung thua British sorkar aiawh TH Lewin nena Saui an tanna pawh tuna Thenzawl thlanmualah hian a ni, Peace City dinna hmun atan pawh a inhmeh hle a ni,” a ti.