Sairanga rel station hnathawh chu zaa za peih fel a ni tawh a. Hawn a nih hunah Sairangah buhfai a thlen tawh dawn avangin buhfai phurhna senso a tlem sawt dawn tih Food, Civil Supplies & Consumer Affairs Minister B Lalchhanzova’n a sawi.
September 13-a Prime Minister Narendra Modi-a’n Sairang rel station a hawn tura ruahmanna kalpui a nih dan leh supply department kaihhnawiha inbuatsaih dante, bungraw lut leh thiarna tur ruahmanna enfiahin nimin khan supply minister hian a tlawh bakah, Sairang Dinthar-a FCI godown leh supply godown sak mekte a tlawh nghal bawk.
B Lalchhanzova chuan Sairang rel station chu PM-in a hawn rualin khualzin leh bungraw phur rel a tlan nghal dawn avangin Sairang atangin FCI depot paruk hnenah buhfai an sem tawh dawn a, Bairabi atanga buhfai thleng chu a tlem sawt dawn tih a sawi a. Rel hmanga Sairang thleng buhfai phurh thlen a nih chuan Bairabi leh Kolasib inkara truck tam tak tlan thin chu a tlem phah dawn a, buhfai phurhna man tam tak an sen thin pawh a tlem tawh dawn tih a sawi.
Chanchinbumite zawhna chhangin Northeast Frontier Railway hotute chuan Sairang rel station chu zaa za hnathawh an zo tawh tih sawiin, hawn a nih hnuah inrelbawlna lam hi Lumding rel station division-in an enkawl dawn tih an sawi.
FCI hotute pawhin Sairang thleng relin buhfai phur mah se, sorkar laipuiin buhfai man a bituk avangin buhfai manah nghawng engmah a nei dawn lo tih an sawi bawk.
Zawhna chhangin supply minister chuan, oil depot lam hi chu tunah hian hmun an ngaihtuah mek tih sawiin, chief secretary hovin an buaipui mek tih a sawi a. Oil depot sakna tur hmuh hnih chu an shortlist a, kumin February vel khan bawhzui mah se IOC-in chhuanlam an siam zel tih a sawi a. Tunah hian DO letter hmangin an umzui mek thu leh chief minister hoa an inruahman chhoh mek thu a sawi.
Supply minister hian Sairang Dinthara FCI godown leh supply department godown sak mekte a tlawh bawk a. FCI godown sak mek chu forest clearance a fel loh avangin hun eng emaw chen chawlhsan a nih hnuah chhunzawm a ni leh tawh a. Godown pathum sak turah pahnih peih fel ni tawhin sak mek pakhat pawh hi kumin chhunga sa zo fel hman turin hnathawktute a chah a. Godown pathumah hian buhfai matric ton 10,000 leng tura ruahman a ni.
Supply godown sak mek a tlawhnaah supply minister chuan kumin October thlaa hman theih tura hna zawh tum turin a chah a. Godown sak mekahte hian buhfai matric ton 3,500 leng tura ruahman a ni.
Minister hi Supply department Director Saizikpuii leh hotu dangten an tawiawm a ni.