MPCC Treasurer Dr Lalmalsawma Nghaka chuan nimin khan Aizawl Press Club-ah thu thar thehdarhttute kawmin, India rama assembly inthlanna hrang hranga ‘vote rûk’ (Vote Chori) a tam avangin India ram politics nasa takin a inher danglam mek tih sawiin, “BJP leh Prime Minister Narendra Modi te duh lohna a pung tual tual a, Rahul Gandhi a lian tual tual thung,” a ti.
Dr Lalmalsawma Nghaka chuan BJP-in vote an tihchingpen (Vote Chori) chungchang chu Gandhi chuan media hmaah August 7 khan puangin BJP hruaitu, Anurah Thakur pawhin vote 2,99,000 rinhlelhawm a awm thu a sawi tih a sawi a. “Thil dik lo a awm nia an rinhlelhna a rei tawh a; mahse, a dik lohna lai an hre mai thei lo,” tih sawiin, Gandhi leh a team-ten thla ruk chhung an chhui chian hnuah thil dik lo tam tak an hmuchhuak ta tih a sawi.
MPCC treasurer chuan Gandhi-a’n a chhuichhuah tam tak zingah Bangalore khawpui chhunga Bangalore Central Lok Sabha seat hnuaia MLA bial pakhat, Mahadevapura Assembly Constituency-ah ngawt pawh vote 1,00,250 tihchingpen a ni a. Hetah hian voter lem 11,960, address lem leh awm lo 40,009, address thuhmuna vote tam tak inthuahna 10,452, thlalak mumal awm lohna voter 4,132, dik lo taka form 6 hmanna vote 33,692 lai a awm thu a sawi.
Hei bakah Maharastra Assembly Election-ah thil dik lo tak a thleng bawk tih sawiin Lok Sabha inthlana vote nei zat aiin state assembly inthlanah vote nei mi nuai 50-in an tam zawk tih sawiin, “A inkar kha thla ruk chauh a ni a, thla ruk chhunga vote nei thar hi kum nga chhunga vote nei thar aiin an tam zawk,” a ti.
Heng inthlana thil rinhlelhawm tak tak hi Congress party chuan polling booth-a CCTV video footage leh voter’s enrollment digital data an dil chu election commission chuan chhuanlam chi hrang hrang siamin an pechhuak duh lo tih a sawi a. Hengte hian election kalpui danah rinhlelhna a tizual hle tih a sawi bawk.
Dr Lalmalsawma Nghaka chuan vote tihchingpen chungchangah hian BJP hian election commission chu thununah puhin, “Tuna Chief Election Commisioner Gyanesh Kumar hi BJP sorkarin dan tihdanglama a ruat a ni,” tiin, BJP sorkar hnuah Election Commisioner Arun Goel leh Ashok Lavas te chuan an bân chhan tar lang mumal lovin an nihna atangin bânna thehlutin an bâng tawh a, hengte hian mite rinhlehna a tizual hle tih a sawi.
Bihar assembly inthlan neih turah Electoral Roll Special Intensive Revision neih mekah pawh hian thil diklo tam tak hmuhchhuah a nih thu sawiin Dr Lalmalsawma Nghaka chuan, hengte avang hian mi thenkhatin Supreme Court-ah election commission hi an khing mek tih sawiin, “India ram politics nasa takin a inher danglam mek a, BJP leh Pu Modi-a te duh lohna a pung tual tual a, Gandhi a lian tual tual thung,” a ti.