Aizawl: All Mizoram CSS Employess Coordination Committee (AMCECC) thukhawm chuan sorkarin an thil phutte a tihhlawhtlin sak lo a nih chuan September 9-11, 2026 chhung hian a huhovin chawlh (mass casual leave) an la dawn.
Youth Recreation Centre, Falklang-ah AMCECC chuan nimin khan sorkar hnuaia an dinhmun siamthatna tura an hmalakna kal zelah state sorkar atanga thu lawmawm an neih theih loh avangin an kal zel dan tur an relin General Body Meeting an nei a. Regularization of CSS Employees Scheme, 2024 chu CSS employee-ten an la hman theih lohna chhan ching fel tura sorkarin hmalakna engmah a neih loh avangin an hmalak zel dan tur an rel a ni.
AMCECC chuan CSS Employees-te’n Regularisation Scheme an siam sak hi an hman ve ngei theih nan siam rem ngai siam rem sak tura sorkarin ngaihtuahna a seng miah lo leh, DP&AR minister thurawn anga AMCECC-in representation May 19, 2025-a an thehluh tawh lehkha tihbosak an nih thu leh a thlenna tur official hnena a thlen loh avangin, representation an thehluh chu rang taka ngaihtuahsaka tihhlawhtlinsak turin sorkar an phut tih an sawi.
Hei bakah Mizoram sorkar hnuaia thawk, CSS employees-ten Regularisation of CSS Employees Scheme, 2024 hnuaia department hrang hrang proposal an hnawl zel laia CSS pawh ni lo, health department hnuaia thawk health worker mi 31, MR skilled II, PE leh a ni te, he dan hmanga an dah nghet hi mak an tih thu leh induhsakna uchuak chu an ngaithiam lovin tun hnuah thleng tawh lo se an duh tih sawiin, he appointment hi sorkarin cancel turin an phut tih an sawi a.
CSS hnuaia thawkte ‘Dan lo anga lak’ tia chief minister-in kumin Independence Day lawmnaa a sawi chu na an tih thu an sawi a. CSS hnuaia thawkte chu dan ang thlapa lak an nih thu leh dan lo anga lak an awm chuan dan lo anga latute chu zawng chhuaka action na taka la turin sorkar an phut tih an sawi bawk.
An thil phutte hi tihhlawhtlin ngei an phut tih sawiin, tihhlawhtlin sak a nih loh chuan ni thum chhung (September 9, 10, 11) hian Mass Casual Leave lak an tum tih an sawi a. An duh anga sokarin hma a laksak loh chuan an kal zel dan tur an ngaihtuah leh dawn tih an sawi.
He totel inkhawm hi an chairman Malsawmtluanga Hauhnarin a kaihruai a, Aizawl khaw chhung bakah Mizoram hmun hrang hrang atangin CSS hnathawkte 1,000 chuang an kalkhawm a ni.