- Lalnunmawia Pachuau
Tun hnaia Mizoram Legislative Assembly Session-a Forest Conservation Amendment Act, 2023 (FCAA 2023) adopted chuan chai chhunzawm a la hlawh chho zel a. Hetiang issue lian hi chu kil khat aṭang chauha thlir chi a ni lo a, kil hrang hrang aṭanga thlir hi a puitlinthlak hle. Mizoram chauh tinzawna dan hi siam a ni lo a, India ram pumpuia hman tura dan siam a ni tih hi kan hriat theuh a ṭha awm e.
He FCAA 2023 hi kan lo hnawl thei reng em? Nagaland nen khaikhin chi kan ni reng em? Kan adopted vang hian Mizoram hi kan lo hralh reng em? Kan ram chhung km 100 bialah National Security atan project lo kalpui ta se kan ram te hi min hnehchhuh buan buan dawn em? IFS Retd. rual ten FCAA 2023 an challenge-na kha Supreme Court-in engtin nge a lo ngaihtuah? FCAA 2023 hi Mizoram mipui boralna tur nge chhanhimna tur tih te hi tun laia kan thu chai ber a ni. Englekhawle, han thlirzau leh ila.
FCAA 2023 hi kan lo hnawl thei rêng em?
Tun lai kan issue ber FCAA 2023 hi dan ang takin kan lo hnawl thei reng em tih hi ngaihtuah tham a ni a, kan ram hruaitu te pawh khan Assembly House-ah an sawi lang nual tawh a, dan thiam thenkhat te pawh a ruh lang rawta lo sawitu an awm bawk. Dan diktak hnuaiah FCAA 2023 hnawl tur hian thuneihna kan lo nei reng em ni tih hi tunlai zawhna tam ber a ni. Article 371G-a kan special provision hi han chhawpchhuak ila:
371G. Special provision with respect to the State of Mizoram
Notwithstanding in this Constitution.—
(a) no Act of Parliament in respect of—
- religious or social practices of the Mizos,
- Mizo customary law and procedure,
- administration of civil and criminal justice involving decisions according to Mizo customary law,
- ownership and transfer of land, shall apply to the State of Mizoram unless the Legislative Assembly of the State of Mizoram by a resolution so decides:
Kan hriat thiam theih dan turin han sawi ila, ‘Parliament dan siam ten he’ng Mizote sakhua leh social practices, Customary law leh procedure, Mizo customary kaihhnawih civil leh criminal justice te, ownership and transfer of land kaihhnawih ang chi reng reng chu Mizoram Legislative Assembly thuthlukna lo chuan apply theih a ni lo’ tihna a ni. A awmzia berah chuan Central dan zawng zawng hi Assembly Resolution hmanga kan lo adopted vek a ngai lo a, kan special provision huangchhunga mi lo khawih thei Dan te chauh hi Resolution hmanga kan lo adopted a ngai a ni. Kan adopted theih ho chauh hi kan hnawl thei bawk a ni.
Article 371G provision hi han thlir leh ila, “Provided that nothing in this clause shall apply to any Central Act in force in the Union Territory of Mizoram immediately before the commencement of the Constitution (Fifty-third Amendment) Act, 1986;” tih a lo inziak kalh bawk a. A awmzia chu, ‘a chunga special provision te hi nei mah ila, State kan nih hma, Union Territory kan nih hun laia mi Dan kan lo hman (apply) tawh te chu a huam lo ang’ a ti thung a ni. Hetiang a nih chuan State kan nih hmaa Dan kan lo hman (enforced) reng tawh te chu kan hnawl thei lo tihna a ni a, adopted kher loa implement nghal theih an ni.
FCAA 2023 pawh Forest (Conservation) Act, 1980 amend-na a ni a, he dan hi UT kan nih lai aṭanga kan implement a ni tawh a ni. Amaherawhchu, 22nd August, 2023-ah Resolution-a lo hnawl a nih tawh vang te, Assembly Record-a a awm vek tawh a nih vangin hnawlna kha Assembly-ah adopted leh a ngai tih hi kan hrethiam tlang turah ngai ila. A lo ṭhatloh tak leh Resolution hmang bawkin kan hnawl leh mai turah ngai ila.. He lam hi chu lut thûk lutuk lo ila..
Nagaland State nen khaikhin chi kan ni em?
FCAA 2023 dodaltu te point pakhat leh chu Nagaland chuan Resolution hmangin an hnawl tih hi a ni. Nagaland nen hian khaikhin chi kan ni reng em tih hi ngaihtuah ve a ngai a. Nagaland chuan Article 371A hnuaiah Ownership & Transfers of land chauh ni lovin RESOURCES an lo neih belh kalh mai a. An Resolution kha ngun deuha han chhiar chuan Resources (Forest) an ti kher a ni.
Nagaland chu December Ni 1, 1963-ah State an ni tawh a, Mizoram Special Provision Article 371G a mi, ‘state nih hma, UT nih laia Dan hman tawh te chu hman tlang tur’ tih provision kha Nagaland provision Article 371A-ah hi chuan a awm ve lo bawk.. Kei ni chuan kan Article 371G-ah Resources hi kan nei ve lo tlat mai a, Nagaland nen hian bawm khata khung chi kan ni lo tih hi kan hriat tlan a ṭha awm e.
Amendment lai chauh kan hnawl thei em?
Forest (Conservation) Act, 1980 (FC Act, 1980) kha siamṭhat, amended a ni tawh a, a provision tihdanglam a ni tawh a, dan thar FCAA 2023 hian FC Act, 1980 provision amended tawh te hi a luahlan (superseded) tawh a ni.
Mi ṭhenkhat hi chuan Amendment leh Principal Act te hi kan hrethiam lo niin a lang. Amendment hnawla Principal Act leh Rules hmasa a mi provision hlui te la hmang theia ngai tlat te an awm bawk. Dan hi duh lai chauh pawma, duh loh lai hnawl theiha ngai pawh an awm bawk! Hetiang hi dan kalphung a ni lo. Supreme Court-in emaw, High Court-in emaw Dan pumpui emaw, a chhunga section ṭhenkhat te unconstitutional a ni e tia a lo hnawl a nih ngawt loh chuan Dan pumpui kha hman a ngai tihna a ni.
Amendment a awm tawh chuan Amendment zawk kha hman tawh tur tihna a ni a, a va luahlan tâk section/provision hlui kha defunct provision a ni tawh a, a hman theih tawh loh. Amendment-a awm tawh chuan a hmaa provision tihdanglam tawh kha a luahlân (superseded) tawh a ni.
Kan hlauh ber International Boundary aṭanga Km 100 hi kan chân vek dawn em ni?
International Boundary/LOC aṭanga Km 100 huamchhunga security project chungchang hi kan sawi vung nasa hle a, kan insawi ṭhaih nasa hle. Hemi chungchangah hian mi ṭhenkhat ngaihdanah chuan International Boundary aṭanga Km 100 hi an duh an mâka min lo hnehchhuh buan buan thei turah an ngai deuh niin a lang a, kan chân hlen vek tura ngai tawk te pawh an awm a ni awm e..
Hemi chungchang ah hian National Security atan linear project kan tih he’ng Kawngpui laih, Railways, Transmission line, etc., an lo kalpui dawn chuan Land Acquisition Law hmangin ram hi an lo lak a ngai. Project lian reng reng hian Reserved Forest area chauh a paltlang ngai lo a, mimal ram leh community ram zau tak a paltlang ṭhin. Mimal ram emaw, NGO ram emaw, sawrkar dept. ram te a paltlang reng rengin Compensation pe lovin an hnehchhuh thei lo.
Article 300A of Indian Constitution hian kan properties te hi dan kaltlang lova min laksak a phal lo a, min venhim sak a, Land Acquisition law kaltlangin emaw, kawng dang pawhin min laksak dawn pawh nise, land owners te hnenah compensation an pek ngei ngei a ngai tihna a ni. Ram lakna dan, RFCTLARR Act, 2023 pawh hmanni lawk khan kan Assembly House-ah adopted a lo ni tawh bawk. Hetih lai hian National Security project hian Recorded/Reserved Forest area a paltlang/khawih laiah erawh Forest Clearance hi a ngai tawh dawn lo tihna a ni mai e.
Entirna han sawi ila; NH-06 (Seling to Champhai) kawng laih zauhna ah hian mimal ram tamtak a paltlang a, chu mi lai karah chuan Tuirini leh Tuivawl Riverine Reserve Forest (RRF) area zimtê a hrût tel a, he Tuirini leh Tuivawl RRF a hrût telah hian Forest Clearance pekchhuah a ni. Mahse, FCAA 2023 dan tharah hi chuan National Security project-in reserved forest area a paltlang turah chuan project a lo tihkhawtlai theih vangin forest clearance pekchhuah a ngai tawh lo a, an ngaihhnathiam (exempt) tihna a ni. Security project atan ni lo, development project dangah chuan Reserved Forest area a paltlangna ah hian Forest Clearance hi a la ngai chhunzawm reng tho.
Forest area development chungchanga exemption te hi chu sawi duah lo ila. Security Camp atana Hectare 10 lo exempt te hi han sawi vung hlurh chi niin a lang lo. Hetih lai hian Sanctuary siamna turah Forest Clearance a ngai lo, exempt a ni tih te hi kan han sawi pawr viau mai a. Ramsa leh nungcha hmangaiha sawitlawr ṭhintu ten FCAA 2023 dodalna hmanrua atana an hmang let daih mai hi a letling viauin a lang bawk.
Sanctuary hi ramngaw tihchhiatna a ni lo a, ramsate awmna tura ramngaw humhalhna zawk a ni. Tin, Wildlife Sanctuary hi Dan hian a humhalh khauh hle a, a kiang hnai Eco Sensitive Zone-a development work thawk tur pawhin Environmental Clearance bakah National Board for Wild Life aṭanga phalna (Clearance) lak ngei ngei a ngai bawk.
National Security Project hi a hlauhawm em?
FCAA 2023 kan dodalna chhan ber chu international boundary aṭanga Km 100 chhunga national Security project an kalpuina tura Forest Clearance dil a ngai lo tur hi a ni. Nakin huna lo thleng tur lo hlauh lawkna, reserved forest area an tichhe vak ang tih hlauhna hi an laimu ber chu a ni.
Heihi lehlam zawngin han thlir ve ta ila, tunah ram dang nen lo indo ta ila emaw, ṭhenawm ram te nen buaina lo nei ta ila, international boundary-a awm kan nih vangin a tuar hmasa ber tur kan ni. Kan ram chhungah kan aiawha hmatâwngtu tur Defence Force, Sipai ten awlsam taka ramchungah veivahna awlsam, kawngpui, Air base leh security camp hmun ṭha te nei lo se a tuartu tur chu Mizoram mipui te tho hi kan ni.
Both side-a thlir chuan nakin hun lo thleng tur thlirin kan hlau a ve ve. FCAA 2023 dodal tu ten ramngaw tihchhiat an hlau a, Dan siamtu te lamin inkalpawhna kawngpui security camp leh air base ṭha awm loh vang te in indona thleng palh se a ram mipui an venghim thei lo ang tih an hlau ve thung. Mi ṭhenkhat environment thlir dan hi chu ramsa, thing leh mau te aiin mihring hi an dah hniam zawk niin a lang.
Supreme Court-in FCAA 2023 a lo kengkawh (implement) nghal:
IFS Rtd. rual ten FCAA 2023 an challenge-na Supreme Court case pending chungchang kha ṭhenkhat chuan Constitution of India kalh vang tih hawi zawngin an sawi vung leh viau mai bawk a. Thuthlukna siam a ni ṭep tawh, a la pending mek tiin FCAA 2023 hnawl mai tura ngai te pawh an awm. (Case title:Writ Petition (Civil) No. 1164 of 2023 (Ashok Kumar Sharma, IFS (Retd) & Ors. V. Union of India & Ors.).
FCAA 2023 an challenge-na point ber hi chu Constitution kalhna lam a ni lo a, ‘Supreme Court-in Godavarman Case-a thuthlukna a siam Forest area definition dictionary meaning leh FCAA 2023 hi a inkalh (contradicted) a, a tidal (dilute) e’ tih hi a ni. Central Sawrkar erawh chuan, “FCAA 2023 hian Godaverman Case-a Forest definition, dictionary meaning te hi a tidal lo a, consolidated-na (nemnghehna) tur zawk a ni” tiin ṭanhmun an khawh thung a ni. He case an chai tirh hian Forest Conservation Amendment Rules, 2023 (FCA Rules 2023) hi la zawhfel a la ni lo nghe nghe.
Amaherawhchu, Central Sawrkar-in FCA Rules 2023 chu 29th November, 2023-ah peihfelin a gazette ta a. He mi hnu hian he FCAA 2023 challenge-na case hi chai chhunzawm niin dated 19th February, 2024 khan Supreme Court hian he dan thar behchhan hian Interim Order a siam ta a a, a lo kengkawh (implement) ta zawk a ni. Chutah chuan State leh UT zawng zawng te chu Rule 16 (1) of FCA Rules 2023 in a phût angin Reserved Forest area Consolidated Record felfai tak neia MoRTH hnena submit tura direction pek an ni.
Amaherawhchu, State leh UT ṭhenkhat te hmalakna a muan deuh vangin report an pe lut har deuh hlawm a. Tichuan, 4th March, 2025 khan Interim Order chhuah lehin Consolidated Record hi thla 6 chhunga peihfel vek turin order a siam leh a ni. He order comply lo tu State/UT an awm a nih chuan concerned Chief Secretary emaw, Administrator emaw ten mawh an phur ang tiin order khauh tak a siam a ni. Hemi Supreme Court order comply hian Mizoram sawrkar pawhin dated 19th March, 2025 khan Expert Committee hi a din ve nghe nghe a ni..
Supreme Court order ang hian loh theih lohvin he FCAA 2023 leh FCA Rules 2023-a hi kan hmang mek tawh zawk a, Expert Committee hnuaiah District tinah District Level Committee te dinin kan rama Reserved Forest area te felfai taka chhinchhiahna Consolidated record hi an buaipui a, tunah hian sawrkar laipui (MoEF&CC)-ah Interim Report te pawh an thehlut tawh nghe nghe a ni.
FCAA 2023 challenge-na case hi Supreme Court hian FCAA 2023 enforce/implement-na atan a lo hmang ṭangkai daih a. Rules 16 (1) of Forest Conservation Amendment Rules, 2023 hnuaia Reserved Forest area te Consolidated tur hian order khauh tak a lo siam ta rap zawk a! Constitution kalh Dan chu ni se Supreme Court hian a lo implement nghal a rinawm loh a, FCA Rules, 2023 behchhan hian Direction khauh tak hi a siam kherin a rinawm loh. Engpawh ni se, thuthlukna te lo la ngaichang ila.
FCAA adopted lo ta ila engtin nge Forest Clearane kan process ang a, dan bawhchhiatna ah khawiah nge kan zualko ang?
FCAA 2023 hi kan State hian lo hnawl ta zel ila engtin nge Forest Clearance te kan process ang tih hi ngaihtuah ngai a ni phawt a. Kan hnawl chung pawhin kan mamawh vanga hmang mek kan ni bawk. Kan tihtheih awmchhun chu Central Dan siam, Forest Conservation Act tlukpui Dan thar siam a ngai. Dan thar kan siam loh chuan Forest Clearance pekchhuahna provision kan nei dawn lo tihna a ni.
Dan thar dang han passed ta ila, Central Dan kalhin kan siam thei lo nghal phawt a, President of India in a lo pawmpui (assent) a lo ngai leh zel a, kan paltang kher ang em tih hi ngaihtuah tham a ni. Central Act, Right to Fair Compensation and Transparency in Land Acquisition, Rehabilitation and Resettlement Act, 2013 (RFCTLARR Act, 2013) aiah Mizoram (Land Acquisition, Rehabilitation and Resettlement) Act, 2016 kan lo siam te lah chu a Central Act dan kalh tiin Gauhati High Court-in min lo hnawl sak tawh a. MNF hun lai kum 2019-a passed tawh ‘The Mizoram (Maintenance of Household Registers) Bill, 2019’ pawh President of India assent lohin a la pending mek nia sawi a ni.
Hei bakah hian FCAA 2023 hi lo hnawl tlang ta ila, Forest Conservation Law bawhchhiatna leh palphûlna a lo awmin khawiah nge kan zualko ang tih hi ngaihtuah a la ngai leh zel a. A hmaa kan zualko ber National Green Tribunal (NGT) kan pan thei tawh dawn lo a ni. A awmzia chu, National Green Tribunal Act, 2010 Schedule 1 hnuaiah hian Environment/Forest Dan lian tak tak 7 a awm a, chung Dan 7 bawhchhiatna chauh chu NGT-ah a zualko theih a ni. He dan 7 zingah hian Forest Conservation Act, 1980 hi a awm a ni. He Schudule 1-a awm FC Act, 1980 ber kan hnawl si chuan Reserved Forest area palphulna leh dan palzutna case-ah NGT-ah kan zualko thei tawh dawn lo tihna a ni.
Mineral Resources chungchang te hi..
Mithenkhat chuan kan natural resources, mine and mineral thleng te hian Article 371G hian kan lo dang vek thei niin an ngai a. Mineral Resources hi chu Union List a nih angin State-in thuneihna kan nei sâng lo khawp a. He mi kaihnawih Central Dan te hi chu adopted ngai lovin kan lo implement nghal tur zawk a ni.
Mineral Resources chungchangah hian Central dan, ‘Mines and Minerals (Regulation and Development) Act, 1957’ (No. 67 of 1957) a awm a ni. He dan hnuaia sub-section 1 of Section 15 hian min phalsak angin kan State-ah chuan kan ram chhunga Minor Mineral Resources enkawl turin Rules siam min phalsak ve thung a, Mizoram Minor Mineral Concession Rules, 2000 kan lo siam ve a ni. Minor minerals kan tih, he’ng Balu lak (sand mining) te, Lung lak (quarrying) atan te hian Lease permit kan lo pechhuak ve thin.
Chuvangin rare earth mineral resources chungchang han sawi vung hlurh te hi eng dan hnuaiah nge mineral resources te hi ngaihtuah an nih? Kan ramah mineral resources te enkawl turin eng dan nge kan neih? Eng chen nge thuneihna kan neih tih thleng hian zirchian hnua sawi vung chi chauh a ni awm e. Independence country kan ni lo, kan administrative system-ah Central sawrkar thuneihna sânzia te hi kan hrethiam turah ngai ila.
Forest cover area nei ṭha state Mizoram..
Forest Advisory Committee (FAC), dated 23rd April, 2019-a meeting chuan Compensatory Afforestation hi ramngaw 75% nei State tan ṭul an tih lo thu an rel a. Hemi kalzelah hian dated 22nd May, 2019 khan MoEF&CC chuan State tin te hnenah thu a thawnchhuak a.. State/UT-in geographical area atanga teha Forest cover 75% aia tam a neih chuan Compensatory Afforestation (CA) hi Forest cover nei chhe zawk State/UT-te hnenah pek theih a nih thu an chhuah a ni.
India State of the Forest Report, 2023 (ISFR 2023)-ah chuan Mizoramin Forest cover a neih zat hi 85.34% a ni. Forest Clearance diltu tea tanga sum, Net Present Value (NPV) leh Compensatory Afforestation (CA) tlingkhawm CAMPA Fund te hi a nihna tur diktak, ramngaw dang siam lehna atan kan hmang ṭangkai em tih te hi ngaihtuah tel a ngai awm e.
Kan Reserved Forest area buai chingchivet lutuk chinfelna atan he hun hi hmang ila..
Supreme Court-in Reserved Forest area Consolidated record nei fel vek tura direction min pek lai hian he dan hi hman ṭangkai dan zawngin kan reserved forest consolidated area submit turah hian kan Reserved Forest area chhunga khua lo din tawh te hi kan excluded thei ang em tih te ngaihtuahna ngai zawk a ni. RRF, ILRF, Tut-Langkaih Protected Council Reserved Forest area mipui inbengbel tamtak te hi engtia chinfel chi nge tih hi mutmawh hnarmawha neih ngai tak zawk a ni.
Reserved Forest area-a mihring lo chên tawhna hmun leh khua te hi regularized phal a ni tawh lo a. Regularized chungchangah hian MoEF&CC-in dated 18th September, 1990 kan ‘Guidelines for Regularization of encroachment on forest land’ lo chhuah tawhin hetah hian Madhya Pradesh, Karnataka, Arunachal Pradesh, Orissa, Gujarat, Kerala, Tripura and Andaman & Nicobar Islands te chuan proposals an thehlut a, hei hi Central Government chuan approved sakin heta regularized area hi 3.66 lakh hectare area lai a ni.
Amaherawhchu, Supreme Court chuan Central Government-in regularization a kalpui zel tur chu a remti ta lo va, dated 23-11-2001 khan order a chhuah ta ni. He mi hnu hian MoEF&CC chuan regularization chungchangah Circular vide No.2-1/2003-FC(Pt) dated 5.02.2004 dang a tichhuak leh a, hei pawh hi dated 23.02.2004 hian Supreme Court hian a stayed leh ta bawk a ni (I.A. No.1126 in WP(C) No. 202 of 1995).
Hetiang hi kan dinhmun a ni a, he’ng kan Reserved Forest area chhunga inbengbel kan mipui te hi engtikawng mahin kan hnawtchhuak thei tawh lo a. Development Project te hi kan ramah a lo la kal dawn chauh a, buaina kan tawh fo ṭhin Forest Clearance leh land Compensation double claim vangin buaina kan tawk leh ṭhin ang. He buaina hi National Security buaina ai mah hian a ril zawk a, kawng tamtaka kan buai phahna bulpui ber a ni zawk a, kan reserved forest area te hi keimahni zawk hian kan lo suasam nasa viau zawk em tih hi zawhna pawimawh tak a ni zawk.
Kan Reserved Forest area te hi dan hnuaiah legal ownership siam ni se..
Reserved Forest area-a awm mihring chênna khua te regularized theih a ni tawh lo tih kan hre chiang tawh a, tunah consolidated record aṭanga kan exclude theih bawk si loh chuan Scheduled Tribes and Other Traditional Forest Dwellers (Recognition of Forest Rights) Act, 2006 (FRA) hi implement-in reserved forest area chhunga kan Mizo mipui, inbengbel te chênna in, huan thlai hmun nghet leh leilet te thleng hian legal ownership an neihna turin sawrkar hian hma a lak chhoh vat a ngai ang. Hetih lai hian reserved forest area chhunga enkawl loh mimal ram te hi cancelled vek a ṭul bawk ang.
Hetianga hmalak hi National Security project lo kal hunah a ṭangkai leh zual dawn a, Reserved forest area chhunga kan mipui chêng te right an palzûtna tura lo vênna atan a pawimawh hle ang. Hei bakah hian kan reserved forest area te hi Notification hmang chauha humhalh lo hian Revenue Department hian Land Lease permit pechhuak vek se la, Forest Department PSU/Agency hminga dah vek ni se. Hei bakah hian Community/Supply Reserved Forest ang chi te pawh hi a enkawltu Branch or Group YMA hnenah Land Lease pekchhuah vek ni se.
Hei hian National Security project-ah pawh Forest Clearance ngai lo mahse, legal ownership claim-in compensation matter hmangin kan Reserved forest ram hlutna te kan claim thei ang a. Lease Permit hian nakin hnuah encroachment leh overlapped thlengin a vêng thei bawk ang. Hemi bakah hian rural area lamah chuan SVAMITVA Scheme hnuaia Property Card system te hi kan hman ṭangkai thiam a ngai viau bawk awm e.
Tute nge mizoram lo hralh reng reng a..?
FCAA 2023 dodal tu ten FCAA 2023 adopted hi Mizoram hralhna a ni an han titawl zel mai a. Mizoram hi India ram State pakhat, February ni 20, 1987-a State-a hlankai, India Constitution Amendment 53rd lo pianchhuahna a ni. India ram state pakhat ni sa reng hi hralh theiha ngai tlat an awm hi Mizoram mipui hi min ngai mawl lutuk niin a lang. India Danpui Constitution hnuaia inrêlbawl kan nih angin Central Sawrkar Dan siam te chu kan ramah kan hman a ngai ṭhin. Artilce 371G lo khawih chin chiah kan lo hnawl thei tih te hi kan hriat a ṭha awm e.
Central Ministry-in kan rama Project an lo kalpui hian ram lakna dan (Land Acquisition law) kaltlangin mimal leh vantlang ram hi a man min pe in an lo la ṭhin. Railways Ministry te, Defence Ministry te, Ministry of Road Transport & Highways te, etc., ten kan ramah hian hmun engemaw zatah project an lo kalpui tawh a. Project kaltlanga ram an lo lak reng reng te hi tuna Mizoram hralh titu te ngaihdan nena hmehbel dawn chuan a inang viau awm e. Project an implement hnu ah chuan National Highways, Railways, ect., ah te hian Mizoram sawrkar hian thuneihna kan nei tawh lo a, Central sawrkar kutah a lut vek tawh a, a lo enkawl vek tawh a ni.
Hetiang chiah hian nakinah pawh National Security atan linear project atan te ram lo la pawh ni se, Land Acquisitition Law hmangin project an lo kalpui a ngai dawn a, mimal ram leh community ram te a paltlangna laiah chuan Compensation an pek vek a ngai tho dawn. Securiy Project hian Recorded/ Reserved Forest area a paltlangna bikah khan a hmaa neih ngei ngei ngai thin Forest Clearance kha a ngai tawh dawn lo tihna a ni mai e. Tichuan ram an lak zawh hunah Central Government-in a lo enkawl chhunzawm leh mai ang. Hei hi development project-a kan ram an lak dan system pangngai a ni.
Project lian 7 an hnuhluh duh vangin Mizoram hralh tih te hi FCAA 2023 dodalna ai mah chuan he FCAA issue hi environmental activism aiin political criticism-ah kan herlut tawh zawk a. ‘BJP tlawnna a ni’ tih te chu kan ṭawngkam hman tlanglawn ber a ni. Ram hmasawn kan duh bawk si a, hetih lai hian project hnuklut thei lo sawrkar lah sawrkar chaklo tiin kan dem rawn leh luai luai bawk si a.
Kan sawi tawh angin FCAA 2023 adopted hi ṭhenkhat chuan ‘kan boralna tur a ni, Zoram hralhna a ni’ an tih laiin ṭhenkhat erawh chuan indona leh ram inrûnna laka ram mipui chhanhimna tur tiin an thlir ve thung. A ṭhenin ramngaw leh nungcha te himna ringawt an ngaihtuah laiin a thenin ram mipui himna an ngai pawimawh thung tih hi he Dan chungchanga ngaihdan inpersan ta chu a ni. He duhthlan tur kawng pahnihah hian tuna kan ram hruaitute thuthlukna chu FCAA 2023 hi Mizoram mipui te tihboralna tur ni lovin, min venhimna tura dan siam tih hi an thuthlukna a ni ta zawk a ni.
Dan siamtu te hi mihring an nih ve tho vangin an mahni tan leh ram mipui te tana pawikhawihna tur chuan Dan an siam burh burh lo ang tih hi mi â nileng lo tan chuan hai tur a awm lo. FCAA 2023 an passed chhan bulpui ber chu Paris Climate Agreement tihlawhtling tura climate change dolet tura awmze nei zawka ramngaw humhalh te, hmasawnna tlo (sustainable development) neihna atan leh India ram venhimna atana security/strategic project-te awlsam zawka reserved forest areas-ah te pawh kalpui a nih theihna tur a ni ti ila kan sawi sual awm love..