- Lalhminghlua
Kum 2021 chawhma lam khan Myanmar ramah buaina a chhuak a, Myanmar atangin Mizoramah mi tam tak an rawn raltlan mek a ni. Kum 2023 May thla tirah Manipur-ah buaina a chhuak ve leh bawk a, heng avangte hian Mizoram mipui chu kan inpawlh sawp nasa ta hle. Mipui chi hrang hrang inpawlhsawp lutukin a hrinchhuah chu buaina a ni tlangpui thin.
Heng rambuaiin a rawn ken tel chu puakthei thil leh silai leng vak a ti tam a ni. Rambuai mek Manipur leh Myanmar lamah silai a luh ruih ruih chuan a chhehvela awm Mizoramah pawh hian silai leh puakthei thil tam tak hi a lut ve ngei niin a lang a, hetiang silai leh puakthei thilte thuneitu lamin an man thawm hriat tur a awm reng a, chanchinthar a luah deuh reng thin bawk a ni.
Tunlai social media hrang hrang thlalak velah hian Mizoram chhungah Pistol leh Silai keng leh kap lai thlalak hmuh tur hi a awm ta nual zel mai a. Heng Pistol leh Silaite hi dan ang taka an nei a nih chuan a sualna a awm lem lo. Mahse, dan ang taka neih loh hi thil awm ve theih a nih avangin kan ram a lo him zel theih nan kan thuneitu lamte hian hma han la zel teh u khai.
Tin, silai hi dan ang taka neih leh dan lova neih pawh nise a hlauhawm dan a in ang reng a. Mitin hian silai hlauhawmzia hi kan hriat a pawimawh hle. Keini Mizoram ralmuang lutuka silai leh pistol pai chhuak thinho hian eng rilru puin nge an pai chhuah thin ang let Ni 29-8-2025 zana Bawngkawn kawngpui hmun lun lai takah Rochhingpuia S/o Haitinsanga chuan Lalhriatrenga chu a kap ringawt maia a va rapthlak em! Khatianga rawva taka silai cheleka mahni Mihringpui kaptu Rochhingpuia kha a phu tawk ang ngeiin a chungah na taka hremna lekkawh nise a tha hle. Tin, a pistol-te kha dan ang taka a neih a ni reng em tihte chanchin thar lamin an puang lo niin a lang a, kha a pistol-te kha dan ang taka a neih a ni em tihte hriat a chakawm hle. Ramchang kang zawkahte chuan silai hmanga pawi khawihna a thlen chang hian an silai neih dan a felfai nge felfai lo tihte chanchin thar lam hian an rawn chhuah vat thin thung a ni.
Tunlaiah Pistol neihte hi mahni invennan a that rualin, Pistol nei chuan midang nen an intihthinrim satliah pawhin an pistol an ngaihtuah chhuak thin a, pistol chu an chuh ta thin a ni. Chu chuan pawi nasa tak a khawih ta thin. Chuvang chuan ram changkang USA meuh pawhin an thunun theih loh midang nunna hlu tak suat vak vak thintu silai leh pistol hi neih ve loh ngam Mizo mipuiten intihhmuh i tum zawk ang u. I thinrimin i pistol i hrechhuak thin, chu chu midang nunna atan thil hlauhawm thlentu rapthlak tak a ni si.
Social Media vela pistol leh silai kenga thla kan lak thin hian naupang zawk rilruah silai leh pistol ngaihsanna leh neih ve chakna rilru thalo a tuh sak theih avangin mihring nunna atana hlauhawm tak, USA pawhin an thunnun hleih theih loh pistol leh silaite chelek chunga thlalak vel uar lo thei ila a va duhawm tehlul em! Mizoram him zelna atan.